Internetti kigaallissaaq meeqqat DVD-ssapput
Immap naqqatigut kabelip suliarineqarnera peqqutaalluni Nuup kujataaniit illoqarfiit nunaqarfiillu tamarmik internetsiat mobildataallu eqqorneqassaaq.
Suliarineqarnerali qanoq sivisutigissanersoq Tusassimit oqaatigineqarsinnaanngilaq, kisianni sapaatit akunnerini marlunni suliarnineqarnissaa ilimasaarutaavoq.
Immap naqqatigut kabeli sapaatiuppat aqqanernut suliaralugu aallartinneqassasoq Tusassip naatsorsuutigaa.
Immap naqqatigut kabelip suliarineqarnera peqqutaalluni Qaqortumi meeqqat inuusuttullu sukisaarsartarfiani Kaassassummi Fortnitersinnaajunnaassapput.
Meeqqat inuusuttullu Fortniteriarlutik takkuttartut, sukisaasaartarfimmi sulisup Hans Peter Petersenip KNR-mut oqaatiga.
Immap naqqatigut kabelip aaqqissuuneqarnera
2019-mi immap naqqatigut kabeli aamma aaqqissuunneqarpoq. Taamani pingasunik qupineqarpoq.
Sisimiut kujasissortaani 30 kilometerinik ungasissusilimmi januarimi 2019-mi qupivoq.
Qupinerup aappaa Sisimiunit 70 kilometerinik avannarpasitsigisumiippoq.
Qupinerullu pingajuat 2018-mi kujataani pivoq.
Kabeli immap naqqani 300-400 meterinik ititigisumiippoq.
Tusassillu oqaatigaa taamani qupinerit ilaat ataaseq raajarniutip qupigaa.
-Soorunami uggornalaarpoq internettip taamaalinissaa, suliarineqalernarata nalaani immaqa qaammataasat atorlugit attaveqaannartitsinissamut, Tusass pitsaanerusumik iliorsinnaagaluarpoq.
-Meeqqaat inuusuttullu maanga spilleriartarput, filmeriartarput, youtuberiartarlutillu, taavalu uagut sulisutut attaveqaatinut internetti atortarparput, Hans Peter Petersen KNR-mut oqarpoq.
Netflix Youtubelu inuulluaritsi
Hans Peter Petersenilu qanga pisarnermisut dvd-it saqqummereerpai sapaatip akunneratalu tullianut piareersarpoq atuartut skemaasa tokoriaannaanerat qulakkeerniarlugu.
Meeqqat inuusuttullu sukisaarsartarfianni internetseerunnissaminnut ippigusussamaaraluarlutik sammisassanik arlalinnik piareersaasimallutik, Hans Peter Petersen KNR-mut oqarpoq.
-Tas' ulluinnarni sammisassaqartitsinerput ingerlatiinnassavarput internetseqanngikkaluamik. Assersuutigalugu multibanemi arsartitsinerit, sammisassallu assigiinngitsut, pinnguartitsinerillu ingerlaannassapput, Hans Peter Petersen oqarpoq.
- Neriuppunga qaammat sinnissanngikkaa, imaluunniit ullorparujussuit atunngikkaluarlugit søkabeli aaqqipallassagaat, Hans Peter Petersen oqarpoq.
Asseq: KNR
Netflixip Youtubellu atorsinnaajunnaarnissaannut merserinnittut ilagaat Augusta Poulsen.
- Qilanaaginnarpunga suliarineqarnerata naammassinissaanut, Augusta Poulsen oqarpoq.
- Ullaakkut piffissanikkaangamalu takulaartarakkit, taavalu eqqissisimaassagaangama isiginnaarujoortarama, soorlu Netflixikkut.
300-400 meterisut ititigisumiipoq
Immap naqqatigut kabeli soorlu atiatigut paasinarsereersoq immap naqqaniippoq. Taamaalilluni umiarsuarmik suliarineqassaaq. Silap allanngorarnera pissuitgalugu immap naqqatigut kabelimik aaqqissuinerup qaqugorpiaq naammassinissaa Tusassimit oqaatigineqarsinnaanngilaq.
”afhænge meget af vind-, vejr og is forhold.”
Kabeli immap naqqani 300-400 meterinik ititigisumiippoq.
Ullukkut atuisunut internetsertoqarsinaarpiarnavianngilaq unnukkullu aamma killeqartorujussuussalluni.
