Imaatigut kabeli iluarsaanneqassasoq: Nunatta kujataani internetti sunnerneqassaaq
![](/sites/default/files/styles/image_934x467/public/article_images/tusass_kort.png?itok=QuW8HBYy)
Nuup kujataani internetti aggustip qiteqqunneranit ajorsissaaq. Tamanna Tusassip imaatigut kabelimik aaqqissuussisussap kalerriutigaa.
- Imaani kabelimi aaqqissuussinissap saneqqunneqarsinnaanngitsup qaqugu pinissaanik avammut nalunaaruteqarnerup maannakkut pinera uatsinnut pingaarutilerujussuuvoq, Kalaallit Nunaatami kujataamiut sapinngisamik piffissaalluarallartillugu kalerrinneqarsimasariaqarput Nuup kujataani najugalinnut tamanut tamanna sunniuteqartussaammat. Tamatuma sullitatsinnut pisarissersuutaanissaa maannangaaq ajuusaarutigalugu nalunaarutigereerparput, Tusassip teknikkimut pisortaa, Jonas Hasselriis tusagassiuutinut nalunaarummi allappoq.
Internetti datamillu atuisut tamarmik aaqqissuussisoqarnerata nalaani annikinnerusumik attaveqassapput. Nalinginnaasumik suliffeqarfiit pitsaasumik attaveqarnissamut akiliilluartartut sunnernikinnerpaassapput. Innuttaasulli nalinginnaasumik internettimut attaveqartut attaveqaatit ajorseriarujussuarnerannik malugisaqassapput.
- Filminik nangeqattaartulianillu isiginnaarnernut, periarfissaqarnissaat ilimanaateqanngilaq, Tusass allappoq.
AAMMA ATUARUK Tele-Post: Kujataani immap naqqatigut kabelimik aaqqissuineq naammassivoq
Suliffeqarfik imaatigut kabelip aaqqissuunneqarnissaanut sapinngisani tamaat suliaqarniarluni neriorsuivoq.
Aaqqissuussinerli qanoq sivisutigissanersoq Tusassip oqaatigisinnaanngilaa.
- Sunami tamaat piareersarluaraluaqalutigu aaqqissuussinerlu aggustimi aallartissallugu, kabelimik imaannarmi aaqqissuussineq umiarsuarmi ingerlanneqartussaavoq. Aaqqissuussinermut taamaattumik anori, sila sikullu apeqquterujussuussapput.
- Taamaattumik maannakkut kalerriutigaarput aaqqissuussinissap aggustip qeqqani aallartinnissaa, sapaatillu akunnerinik arlalinnik sivisussuseqarsinnaanera, Jonas Hasselriis oqarpoq.
Radio aamma TV, Sinerissami radio, timmisartunut radio aamma Kalerrisaarut 112, oqarasuaatit sms-illu sunnerneqassanngillat.
Savaateqarfiit (Avinngarusimasumi najugaqarfiit) sullitallu allat, soorlu illoqarfiit avataanni piiaaffeqarfiit namminneq pigisaminnik VSAT-stationillit sunnerneqassanngillat
Paamiut, Qaqortoq, Narsaq, Narsarsuaq aamma Nanortalik kiisalu Nuummiit kujammut nunaqarfiit tamarmik imaani kabelip aaqqissuunneqarneranit sunnerneqassappu, Tusass allappoq.