Assammik arsarneq: Nunanut allanut unammisartussat makussarneqarput

Kalaallit arnat inuusuttut U-17-it ukioqatiminni VM-imut anngunniuteqataapput unamminerit Mexicomi pimmata.

Kalaallit nunanut allanut unammisartut ukioqatigiinni arlalinni siornatigut ajugaaffigisariigaat Canada unammersuarnermi ajugaasuuvoq. Nunat allat aamma kalaallit ajugaaffigisariigaat siuariartupiloorput. Unamminerni aallarniutaasuni Mexico aamma USA kalaallinut ajugaapput.

Taamaattoq siunissamut isumalluarneq kalaallit assammik arsartartut kattuffianni TAAK-mi attanneqarpoq.

- Angusat, inissinnerit isertitsinerillu imatut maanna eqqarsaatigivallaanngilagut. Nuannaarutigineruarput manna assammik arsarnermi inerisaanerup aallartiffiatut isigigatsigu, TAAK-mi siunnersorti Johannes Groth oqarpoq.

TAAK aningaasaqarniarnikkut ilungersunartorsioreerluni siumut saappoq. Juullimilu tunissut siusinaartumik  pissarsiaraat Mexicomi unammeqataaneq nunarsuarmi assammik arsartartut kattuffiata IHF-ip akilermagu.

Taamaattumik aningaasaqarniarnermik annaassiniarnermiit nunanut allanut unammisartunik inerisaanermut suliat sangutinneqarput. Suliallu ilungersunarsinnaanera qanittukkut paasinarsivoq Mexicomi VM-imut anngunniunneq naammassimmat.

Siunissamut isumalluarneq

- Siullermik eqqaasariaqarpoq U-20-ni VM-imut aasaq anngunniuttoqarmat Canada aamma ajugaasoq maanna U-17-ini aamma ajugaasuummat. Canadamiut siuariartupiloortut aamma Mexicomiut siuariartupiloortut takusinnaavarput, Johannes Groth oqarpoq.

- Taamatut inissittoqarnerani uagutsinnut pingaaruteqarpoq maluginiarluassallugu inerisaanissamut periarfissat sumiinnersut. Assersuutigisinnaavarput Islandimiut Savalimmiormiullu suleqatiginissaannik isumaqatigiissut qanittukkut atsiorneqartoq. Qallunaat assammik arsartartut aamma suleqatigaavut. Taakku suleqatissatut uagutsinnut piukkunnaateqarnerupput arsariaaseq aaqqissuussaanerlu Europamiut suleriaasiannut assingusoq inerisarlugu ingerlagatta, Johannes Groth oqarpoq.

TAAK-mit aamma neriuutigineqarpoq niviarsissat U-17-it siuariartornissaq suli upperissagaat.

- Nunanut allanut unammisartuuneq sakkortusinnaavoq. Ilaasa misilereerpaat kisianni aamma nutaartaqarput ilaatigut 14-iinnarnik ukiullit. Qularnanngilaq Mexicomi peqataanerminni misilittakkanik katersilluarsimassasut. Sungiunniagassarpassuupput. Unammisartut siunissamut anguniagaqarusuttut tapersersorniarumaarpagut suleqatigiinnissamillu isumaqatigiissutit taaneqartut inerisaanissatsinni sinaakkusiilluartussaapput, Johannes Groth oqarpoq.

Arnat assammik arsarnermi nunanut allanut unammisartut arlariit 2025-mi susassaqartinneqarput. U-20-ni nunanut allanut unammisartut  VM-imut aasaq anngunniuteqataapput aamma arnat inersimasut oktoberimi Islandimiikkamik Islandip U-20-ni nunanut allanut unammisartuinut sungiusaammik unammillutik.

TAAK anguniagassinnikuuvoq arnat inersimasut VM-eqarneranni 2027-mi anngutissasut.