Assammik arsarnermi tusaamasaq: Ikinngutigiinnerit ujamminit naleqarnerupput
Siornatigut Danmark sinnerlugu OL-mi assammik arsarnermi kultinnaqataasup Josephine Tourayip kalaallit meeqqanik inuusuttuaqqanillu sungiusaasut junip aallartilaarnerani naapisimaarpai.
Pingaarnertut siunertaavoq meeqqat inuusuttuaqqallu assammik arsarnermi Nunatsinni toqqissisimasoqarnissaa.
Josephine Touray ullumikkut Hej Fondenimi, timersornermi qinngasaaruttarnermi akiuiniarfiusumi, pisortaavoq Nunatsinnilu assammik arsarnermi paasisassarsiorluni.
- Timersornermi toqqissisimaneq pingaarnersaavoq apeqqutaanani U-11-ni peqataaneq imaluunniit nunanut allanut unammisartuuneq, Josephine Touray KNR-mut oqarpoq.
- Qallunaat angutit nunanut allanut unammisartut qiviaannarsinnaavagut malunnarmat assut ataqatigiilluartut angusarissaartarlutillu. Uanga nammineq unammisartuusimanera kingumut qiviassagukku taava ikinngutigiinnerit initunerorpasipput ujamminit pissarsiarisimasannit, Josephine Touray oqarpoq.
Nunatsinnut tulluarsagaq
Mary Fonden qinngasaaruttarnermik akiuiniarfiusoq Hej Fondenimit suleqatigineqarpoq.
Taakku suleqatigiillutik periutsinik inerisaapput "Antibulli"mik taaneqartartunik taakkulu sungiusaasunut atugassiaapput.
- Sungiusaataapput sungiusaasunut pisariillisaatit toqqissisimatitsiniarnermi qinngasaaruttarnerullu akiorniarnerani pisariitsumik atorneqarsinnaasut. Taakku arsaqarluni arsarnaniluunniit atugassiaapput arsarfimmi arsarfiullu avataani toqqissisimatitsiniarnermut atorneqarsinnaasut, Josephine Touray oqarpoq.
- Uanilu Kalaallit Nunaanni assammik arsartartut kattuffiat sumiiffinnilu peqatigiiffiit suleqatigalugit sungiusaatit periutsillu sorliit kalaallinut inuiaqatigiinnut tulluarnerunersut nalilersorneqassapput ilaallu kalaallisuumut nutserneqarlutik. Sungiusaasunik pikkorissaaqataassaagut assammik arsarluni sungiusartarneq nuannereersoq suli nuannernerulersinniarlugu, Josephine Touray oqarpoq.
Qallunaat tusaamasat Hej Fondenimi aallartitatut sulipput. Taakku tassaapput Mikkel Hansen, Mathias Gidsen aamma Mie Højlund.
