Kunngissap nuliata Kammagiitta paasisassarsiorfigilerpaa
Kunngikkormiut peqataatilulgit suliniutit tamanit maluginiarneqarnerulersarput tamannalu aamma malunnaarpoq Mary Fondenip Kaammagiittami suleqataanerani. Suliniut maanna nunatsinni atuarfinni meeqqerivinnilu ataavartunngorpoq angusallu naammagisimaarneqarput.
- Suliniut pillugu ilisimatinneqaqqaaratta assut nuannaarsimavugut. Danmarkimi taamatut suliniarneq iluatsereerpoq, atortussallut kalaallisuumut nutserneqareersimammata piaartumik suliniut Kalaallit Nunaannut eqqupparput. Aamma suliutip ingerlaneranit angusat takutippaat neriuutigineqartut anguneqarsimasut, Ilinniartitaanermut, ilisimatusarnermut nunanullu avannarlerni suleqatigiinnermut naalakkersuisoq Palle Christiansen oqarpoq.
Mary Fondenimiit aamma suliniutip ingerlanera naammagisimaarneqarpoq ukiunilu aggersuni malinnaaffiginissaa qilanaarineqarluni.
- Kaammagiitta aqqutigalugu qinngasaaruttarnerup akiorniarnerani qitiulluinnarpoq suliniutip Kalaallit Nunaannut naleqqussarluni pigineqalernissaa. Taamaattumik suliniut aallartisarneranlu kalaallit suleqatigilluinnarlugit ingerlavoq. Tulluusimaarutigaarput nuannaarutigalugulu Kammagiitta Kalaallit Nunaat tamaat siuaruarsimammat. Maannalu tassa qilanaarpugut tikeraarluta suliniutip malunnartinniarnissaanut, tassanimi kalaallit meerartaat sakkussalerneqartarput qinngasaaruttarnerup akiorniarnissaanut aammalu peqqinnartumik meeqqat ataatsimoorfissaqalernissaannut, Mary Fondenimi pisortaq Helle Østergaard oqarpoq.
Naalakkersuisuni pingaartinneqarsimavoq suliniut aqqutigalugu meeqqat inuusuttullu atugaasa pitsanngorsarnissaat.
- Meeqqanut inuusuttunullu politikkimi pingaartitatta ilagaat inooriaatsimi kingornutat pitsaanngitsut kipitinnissaat mannalu suliniut atorlugu tamatuma anguniarnissaanut pitsaasunik sakkussaqalersimavugut. Angusaqarluarnerup suliniutip ingerlatiinnarnissaanut assut piumassuseqalersippaatigut assullu qilanaarpugut suliniutip nuna tamakkerlugu atulernissaa, Palle Christiansen oqarpoq, taassumalu Kronprinsesse Mary sapaatip akunnera tulleq angalaqatigissavaa.
