Kunngissap nulia Mary nunatsinnut tikeraalerpoq
Kunngissap nulia Mary aggustip 23-aniit 25-iata tungaanut Nuummut tikeraassaaq.
Taanna tikeraarnermini Mary Fonden peqatigalugu aaqqissuussanut ataatsimiinnernullu assigiinngitsunut peqataassasoq, Mary Fonden tusagassiuutinut nalunaarummi allappoq.
Mary Nuummiinnermini Naalagaaffiit Peqatigiit nunarsuami anguniagaanni inuusuttut 200-t nunanit avannarlerneersut issittumeersullu ineriartortitsinissamik isumassarsiorlutillu ataatsimiinnerannut aamma peqataassaaq.
Inuusuttut taakku nunarsuarmi peqqissutsip qanoq pitsanngorsarneqarsinnaanera sulissutigissavaat, ilinnialernissamut pitsaanerusumik periarfissaqalernissaq, silallu pissusiata ilungersunartumik inissisimaneranik qanoq aaqqiiniartoqarsinnaanersoq eqqartorneqassasoq, tusagassiuutinut nalunaarummi allaqqavoq.
- Inuusuttut 200-t qulequttanut aalajangersimasunut qanoq iliortoqarsinnaaneranik siunnersuuteqarnermikkut iluaqutaassaqaaq, tassa nunarsuarmi unammillernartut annersaat qanoq qaangerniarneqarsinnaaneranni siunnersuuteqartussaapput. Inuusuttut siunnersuutissaqaqaat, taamaammat suliniutaasa paasisaqarfiginissaat qilanaaraara, kunngissap nulia Mary oqarpoq.
Kalaallit Nunaannut tikeraarnermini ilaatigut ataatsimiinnermut “aliasunneq ataatsimoorutsigut”-mik taaneqartumut peqataassaaq, taanna Det nationale Sorgcenterip aaqqissuussaraa.
Mary Nuummi ulloq unnuarlu angerlarsimaffimmut Mælkebøttenimut aamma pulaassaaq. Kiisalu nunarsuaq tamakkerlugu suliniaqatigiiffimmi WWF-imit aaqqissuussamut peqataassaaq, nunatsinnilu UNICEF naapissallugu.