Politiit Maqaasineqartup toquneranut alianartumik pisoqarnera pissutaasoq

32-nik ukiulik, Amos Jonassen maqaasineqartutut decembarimi nalunaarutigineqartoq toqungasoq ataasinngormat nassaarineqarpoq. Toqungasup timaanik tulliuttunillu misissuinerup tamatumani pinerluttoqarsimannginnera takutippaat.

Allattoq Mikkel G. Rasmussen

marsip 15-at 2023 10:49

Nutserisoq Connie Fontain

Meeqqat sisamat blok 17-ip eqqaani apummi inummik toqungasumik ataasinngornermi ualikkut nassaarput.

Misissuilluartoqarnerata takutippaa pineqartoq tassaasoq angut 32-nik ukiulik, Amos Jonassen, taanna 2022-mi decembarip arfineq-aappaani maqaasineqartutut nalunaarutigineqarpoq.

Kalaallit Nunaanni Politiit tusagassiuutinut taama paasissutissiipput.

Toqungasup timaa marlunngornermi ullaap tungaani misissorneqarpoq, nassaarfiusumiillu misissukkat ilanngullugit angut alianartumik pisoqarneratigut toqusimasoq inerniliissutigineqarpoq, tamannalu angutip qanigisai eqqarsaatigalugit politiinit itisiliiffigineqarsinnaanngilaq.

Meeqqat sisamat toqungasumik nassaartuusut nassaarnermi kingorna nalaatsinerlunnermik ikiueqqaarfigineqarnissaannik neqeroorfigineqarput, Kalaallit Nunaanni Politiit misissueqqissaarnermi immikkoortortaani aqutsisoq, Malik Sandgreen oqarpoq:

- Meeqqat inummik toqungasumik taama nassaarnerat soorunami meeqqanut sakkortuvoq, taamaammat erngertumik isumagineqarput. Meeqqat pisoq oqaloqatigiissutigilluarsinnaaniassammassuk taamalu nalaatsinerisa kingunerisaanik qisuariaataasinnaasunut ilaqutaat piareersarneqarnissaannut tarnip pissusianik ilisimasalimmit nalaatsinerlunnermik ikiueqqaarfigineqarnissamik neqeroorfigineqarput.

Kalaallit Nunaanni Politiit suliamut atatillugu allamik oqaasissaqanngillat.

Decembarip arfineq-aappaanili maqaasineqalersoq

Amos Jonassen 2022-mi decembarip arfineq-aappaani maqaasineqalerpoq.

Taassuma oqarasuaatikkut akisannginnera aamma nammineq angerlarsimaffimminiinnanilu nalinginnaasumik sumiiffigisinnaasaaniinnginnera pissutigalugit maqaasineqartutu nalunaarutigineqartoq, politiit taamani paasissutissiipput.

Aamma atuarukAngut maqaasineqartoq kajumissutsiminnik ikiuuttut ujaarigaat

Nuummi Radiop Qaqqaani toqungasumik nassaartoqarnera pillugu ataasinngornermi ualikkut nalunaaqutaq 15.59 nalunaarfigineqarput.

Tamatuma kingunitsianngu poliitit, ambulance qatserisartullu ornigutsinneqarput.

Nassaarfiusumili pissutsit silallu qanoq innera pissutigalugit toqungasup kinaassusersiniarnera kiisalu toqungasumik Dronning Ingridiup Napparsimmavissualiaanniarneqarnera ajornakusoorsimavoq.