Angut maqaasineqartoq kajumissutsiminnik ikiuuttut ujaarigaat

Amos Jonassen decemabrip arfineq-aappaannili takuneqarami suli takuneqaqqinngilaq. Politiit ataasinngormat kingullermilli ujaarilerpaat.

Nuummi inuit nammineq kajumissutsiminnik 32-nik ukiulimmik maanna ujaasilerput.

Kajumissutsimik ujaasinissamut Rosa L. Lorentzen aallarniisuuvoq ikiuuttussarsiornerminilu Facebookimi qupperniliorpoq qulequtalimmik ”Ammu Amos Martin nanisigu”.

- Neriuppunga ajunngitsoq nassaarineqassasoq, neriuppungali aamma suli amerlanerusut kajumissutsiminnik ujaaserusuttut tutsiutissasut, juullimi aajunaararsuanngorpoq, Rosa Loretzen KNR-imut oqarpoq.

AAMMA ATUARUK Angut ujaarineqartoq suli maqaasineqartoq

Angut tammaaneqartoq Rosap illooraata ernissarivaa, taamaalillugulu meeraaneraniit ilisimarisimallugu, taanna oqaluttuarpoq kajumissutsiminnik ujaaserusuttut arlaqaraluartut arlaqarnerusinnaasulli:

- Ippassaq inuit 600-t missaat ilaasortanngorsimasut takuakka aamma siammarteraat takuara, kisianni suli amerlanerullaqunarput sulimi inuit amerlanerusut atorfissaqartippagut, taanna oqarpoq nangillunilu:

- Illoqarfik isorartugami, sulilu sumiiffiit ilaat ujaasiffigineqanngillat soorlu: sanaartorfiit, inissiaqarfiit qaqqallu.

Rosa Lorentzen aamma oqaluttuarpoq paasissutissat nutaat aamma kajumissutsiminnik ujaasisut ujaasiffigereersimasaat Facebookimi quppernermut ataavartumik paasissutissiissutigisarini.

Amos 165 centimeterimik angissuseqarpoq tuattuullunilu. Kingullermik takuneqarami atugarai teqqiaq aappaluttoq, sullisit qernertut kamippaallu Salomonit qernertut qaqortunik titarnillit.

Amos Jonassenimut tunngatillugu paasissutissaateqaraanni politiit attavigeqquneqarput oqarasuaammut 70 14 48-mut.