Múte B. Egedep Blinkenimut oqarnera: Nunarput pillugu avaqqunneqartassanngilagut
USA-mmi Nuummi sinniisoqarfia ukiup ataatsiunngitsoq matuma siorna ammaqqippoq.
Amerikamiut nunatsinnut 83 millionit koruuninik nunatsinnut nassiussiniarlutik siorna apriilimi aamma nalunaarutigaat – aningaasat taakku amerikamiut sinniisoqarfiat suleqatigalugu – ilinniartitaanermut, takornariaqarnermut aatsitassanullu atorneqassapput.
Amerikamiut nunanut allanut tunngasunut ministeriat, Antony Blinken Kangerlussuarmut akunnerni tallimani ippassaq tikeraarpoq.
Amerikamiut nunanut allanut tunngasunut ministeriat Kangerlussuarmut akunnerni tallimani ippassaq tikeraarpoq.
Taassuma Pele Broberg, Múte B. Egede aamma danskit nunanut allanut tunngasunut ministeriat Jeppe Kofod peqatigalugu Sermersuaq qulimiguulimmik angalaarpaat Black Ridgemukarlutillu.
Tikeraarnera tusagassiortunik katersortitsinermik naggaserneqarpoq.
Blinken Reykjavikimi Issittumi Siunnersoqatigiit ataatsimiinnerani peqataareerluni tikippoq.
Taanna ataasinngormat Københavnimiippoq, tassanilu Pele Broberg ilaatigut aamma ataatsimeeqatigalugu.
Tassanilu Múte B. Egede (IA) naalakkersuisut siulittaasorisaat aamma nunanut allanut tunngasunut, niuernermut, silap pissusianut inuussutissanullu naalakkersuisoq, Pele Broberg (N) coronamut illersortumik ikusimminik ilassivai.
AAMMA ATUARUK Blinken qulimiguulimmik Sermersuarmeereerluni: Silap pissusiata allanngoriartornera annilaarnarpoq
Múte B. Egedelu ataatsimiinnerup kingorna USA-mut atassuteqarnermut tunngatillugu neriuuteqarluartoq nuannaarpoq.
- Ullumi ataatsimiinnerup kingornatigut USA-p siunissami pitsaanerusumik suleqatiginissaa tunngavissinneqarpoq. Naleqartitanik nunatsinni inuit USA-llu pigisaannik ineriartortinneqassaaq, Múte B. Egede oqarpoq.
Isumaqatigiinngissutaasoq
Blinkenilli tikeraarnerani politikkikkut isumaqatigiissuteqartoqanngilaq – qanoq pilersaarnermik nalunaaruteqarnerullunilu nunatta USA-llu suleqatigiinnerata pingaaruteqarneranik imminut taperserneruvoq.
Kalaallilli amerikamiullu atassuteqarneranni isumaqatigiinngissutaasartoq Pituffimmi kiffartuussinissamik isumaqatigiissummut tunngavoq. Tamanna tikeraarnerani aamma tikinneqarpoq.
Antony Blinken Kangerlussuarmi. Assi: Scanpix
Pituffimmi kiffartussinissamut isumaqatigiissutinut suliaq 2014-imi allartippoq. Tassani USA-p isumaqatigiissut milliardinik koruuninik naleqartoq amerikamiut pigisaannut ingerlatseqatigiiffimmut tunniuppaa.
AAMMA ATUARUK Video assillu: Blinken Kangerlussuarmut tikittoq
Taamaalilluni aserfallatsaaliuineq, sanaartorneq, kantiinamik ingerlatsineq allallu amerikamiut ingerlatseqatigiiffiata isumagisarilerpai.
Isumamik akerleriiffiusumik amerikamiut ingerlatseqatigiiffiannut isumaqatigiissuteqartoqarnissaa sioqqullugu danskit kalaallillu ingerlatseqatigiiffiata, Greenland Contractorsip kiffartuussinissamut isumaqatigiissut ukiuni siuliini 46-ni tigummisimagaluarpaa.
Isumaqatigiissut taanna nunatta karsianut ukiumut 200 millionit koruunit missaannik iluanaarutaasaraluarpoq. Amerikamiut Greenland Contractorsimut suleqatiginninnerminik unitsitsinissamut aalajangernera nunatsinni Danmarkimilu ilorrisimaarutigineqanngilaq, allaallumi suliaq eqqartuussivimmut suliassanngortinneqarluni.
Pineqartilluta avaqqunneqartassanngitsugut
Siornali oktobarimi nunarput, Danmark USA-lu nutaamik isumaqatigiissusiorput, ingerlatseqatigiiffillu siunissami kiffartuussinissamut isumaqatigiissuteqarfigineqartoq Kalaallit Nunaanni allaffeqartarnissaa isumaqatigiissummi tassani allassimavoq.
- Amerikamiunut ersarissumik oqaatigivarput issittumi ineriartornermut aammalu suleqateqarnermut amerikamiut annertusaarusukkunik Kalaallit Nunaat avaqqussinnaanngikkaat uagullu pineqartilluta avaqquneqartassanngitsugut, Múte B. Egede oqarpoq.
AAMMA ATUARUK Pele Broberg: Blinkenip paasisariaqarpaa Danmarkiunngitsugut
- Aammalu maaniinnerminni aammalu suleqatigiinneq nunatta amerikallu akornanni ingerlassappat tamatta pissarsissutiginissaanik aamma tunngaveqartumik sulisariaqarpugut.
Kiffartuussinissamullu isumaqatigiissutinut tunngatillugu akerleriinneq maanna qaangiuttoq, Naalakkersuisut siulittaasuat isumaqarpoq.
- Amerikamiut nunatsinnut tikeraarnerata tunngavissippaa nunatta USA-llu akornanni ukiuni 80-ini kingullerni ilisareqatigiissimanerup aammalu ineriartornermik imaluunniit suleqatigiinnermik ineriartortsisimanerup alloriarfissaata tulliup alloriarfiginissaanut suleqatigiinnerullu annertunerulernissaanut alloriarfimmik tunngavissiineq.
