Video assillu: Blinken Kangerlussuarmut tikittoq
Amerikamiut nunanut allanut tunngasunut ministeriat, Antony Blinken Kangerlussuarmut tikeqqammerpoq.
Antony Blinken aallaqqinnginnermini akunnerni tallimani Kangerlussuarmiissaaq.
Blinken amerimamiut nunanut allanut tunngasunut ministereqarfimmi januaarimi ministerinngorpoq, nunarpullu nunani tikeraagaani siullerpaat ilaanniilluni. Tamannalu paasinerlunneqarsinnaanngitsoq, Inatsisartunut siulittaasuusimasoq, nunatsinnilu politikkikkut ukiorpassuarni suliaqarsimasoq, Lars-Emil Johansen oqarpoq.
- Uanga imatut paasivara USA-p Issittumi politikki pingaarnerpaatitaanut ilaasoq, immaqaluunniit paasilerpaa kingusinaalerluni, Lars-Emil Johansen KNR-imut oqarpoq.
Saamiani amerikamiu Charge dAffaires Stuart Dwyer, qeqqani Antony Blinken talerpimmilu Múte B. Egede.
- Russit ukiuni kigullerni annertoorujussuarmik piorsaanikuupput, allaat Qalasersuaq Avannarlermi immap naqqani russit erfalasuat qangarsuarli ikkunnikuuvaat. Aamma ippassaaninnguaq russit nunanut allanut ministeriata, Sergei Lovrovip oqaatigaa Issittoq namminneq nunagalugu. Kisianni tassa amerikamiut maannakkut naalakkersuisui nutaat, Bidenip naalakkersuisui, Antony Blinken nunanut allanut ministereralugu Issittumi ineriartortitsineq pingaartinniarlugu aalajangersimapput, Issittumi isumannaallisaaneq, Issittulerngusaanneq kingusaaffigerusunnagu.
AAMMA ATUARUK Amerikamiut nunanut allanut tunngasunut ministeriata ullumi pisassai
Blinkenillu Danmarkimut tikeraarnermi aamma Issittumi Siunnersoqatigiinni ataatsimeereernermi kingornatigut Kangerlussuarmukarnera paasissutissani pingaaruteqarpoq. Danskit nunanut allanut tunngasunut ministeriata, Jeppe Kofodip nunatsinnukaqataaneranut Danmarkip Issittumi Siunnersoqatigiinni ilaaneranik pissuteqarpoq.
Antuummik taasinnaagipput
- Kalaallit Nunaanukarnera imatut paasisariaqarpoq amerikamiut maannakkut ersersippaat Issittoq oqaluuserissatillugu Kalaallit Nunaat saneqqutiinnarlugu Københanvimukaqattaarsinnatik paasisimallugu, Lars-Emil Johansen oqarpoq.
- Ima oqarlutik: 'Issittoq oqaluuserissagutsigu Kalaallit Nunaanukartariaqarpugut’. Tamanna Kalaallit Nunatsinni tulluusimaarutigisinnaavarput. Naalakkersuisugut silarsuarmi naalagaaffiit pissaaneqarnerpaat nunanut allanut ministeria naapikkiartorpaat. Danmarkip nunanut allanut ministeriata Tonymik taammagu, uagut aamma kalaallisut atsersinnaavarput – Antuut, Lars-Emil Johansen oqarpoq.
Antony Blinken Black Ridgemut angalaarnermi. Assi: Scanpix
Ataatsimiinnermi siullermi ima ittumi suna oqallisigissallugu pingaaruteqarpa? Politikki oqallisigineqassava imaluunniit nunagisaq saqqummiunneqassava?
- Soorunami nunagisaq saqqummiunneqaqqaassaaq. Taama apeqqutit angisuut tulliutissapput - assersuutigalugu silap pissusiata allanngoriartornera. Tamatuma kingora sillersornissamut politikkimut sangujartorsinnaapput naggataatigullu pingaarneq tikinneqarluni. Sammisanit annikitsunit annertuunut ingerlaartoqartarpoq, Kaj Kleist oqarpoq.
Taanna Namminersornerullutik Oqartussani pisortaanikuuvoq, ukiorpassuarnilu sunniuteqarluartutut atorfiliusimalluni.
AAMMA ATUARUK Amerikamiut nunanut allanut tunngasunut ministeriata ullumi pisassai
Antony Blinken Naalakkersuisut siulittaasuannit, Múte B. Egedemit mittarfimmi tikilluaqquneqarpoq.
Tamatuma kingorna Issittumi Sakkutooqarfiup inaataanukarput, tassanilu Egede aamma nunanut allanut tunngasunut, inuussutissanut silallu pissusianut naalakkersuisua Pele Brobergilu ataatsimeeqatigalugit.
Danskit nunanut allanut tunngasunut ministeriat, Jeppe Kofod aamma ilaavoq.
Tamatuma kingorna tusagassiortunik 16.45 katersortitsisoqannginnerani Black Ridgemut angalaartoqarlunilu Sermersuaq qulimiguulimmik qulaavaneqassalluni.
Maana knr.gl-ikkut nalunaaqutaq 16.30-mit malinnaasinnaavutit.
Nunanut allanut tunngasunut ministerip timmisartua Kangerlussuarmi mittarfimmi.
Naalakkersuisut siulittaasuat, Múte B. Egede Antony Blinkenimut tikilluaqqusinissaminut piareersimavoq.
Jeppe Kofod aamma Pele Broberg anersaartuutinut illersuuteqarlutik Antony Blinken Issittumi Sakkutooqarfimmut ataatsimeeqatigiartorpaat.
Amerikamiup, Sung Choi-ip Antony Blinken tikilluaqqujartorpaa.
