Amerikamiut nunanut allanut tunngasunut ministeriata ullumi pisassai

Antony Blinken Kangerlussuarmut nalunaaqutaq 12.50 tikissaaq 17.45-lu aallaqqissalluni. Tikeraarnera KNR-imi malinnaaffigisinnaavat.
Antony Blinken Københavnimut sapaatiummat unnukkut tikippoq. Assi © : Scanpix
Allattoq Christine Hyldal
maajip 20-at 2021 09:23
Nutserisoq Connie Fontain

Amerikamiut nunanut allanut tunngasunut ministeriat, Antony Blinken nunatsinnut nalunaaqutaq 12.45 tikissaaq.

Taassuma akunnerni tallimani Kangerlussuarmiinnermini Naalakkersuisut siulittaasuat, Múte B. Egede (IA) aamma nunanut allanut tunngasunut, inuussutissarsiutinut silallu pissusia pillugu naalakkersuisoq, Pele Broberg (N) ataatsimeeqatigissavai.

Pele Brobergip oqarnera naapertorlugu ataatsimiinnermi ingammik niuerneq nunallu akornanni niueqatigiinnerulernisssa – pingaartumillu nunatta amerikamiut nioqquteqarfiinut tunisisarnera eqqartorneqassapput.

Antony Blinkenili ataatsimiittarfinniiginnaranilu coronamut illersortumik ikusimmik ilassinniinnassanngilaq.

Taannami nalunaaqutaq 17.15 tusagassiortunik katersortitsisoqannginnerani Kangerlussuarmi qaqqamut Black Ridgemut angalaassaaq qulimiguulimmillu Sermersuaq qulaallugu angalassalluni.

Maana knr.gl-ikkut Kangerlussuarmit Nuummiillu toqqaannartumit nalunaaqutaq 12.30-mit 13.15-imut aamma 17.00-imit 18.00-imut aallakaatitsinitsinnit malinnaasinnaavutit.

12.15: Danskit nunanut allanut tunngasunut ministeriat, Jeppe Kofod Kangerlussuarmut tikissaaq.

12.50: Antony Blinken Kangerlussuarmut tikissaaq.

13.00: Antony Blinken, Múte B. Egede aamma Pele Broberg Issittumi Sakkutooqarfimmi ataatsimiissapput.

13.30: Bussinik Black Ridgemut angalaarneq

14.20: Neriniartarfimmi Roklubbenimi ullup-qeqqasiorneq

15.30 – 16.15: Qulimiguulimmik Sermersuarmut angalaarneq

17.45-17.15: Air Greenlandip timmisartunut inissiivianit tusagassiortunik katersortitsineq.

17:45: Antony Blinken aallaqqissaaq

18:00 Jeppe Kofod aallaqqissaaq.

Antony Blinken sapaatiummat unnukkut Københavnimut tikippoq, taanna marlunngornermi pingasunngornermilu Islandimiippoq, tassanilu Issittumi Siunnersuisoqatigiinni ataatsimeeqataalluni. Pele Broberg aamma Jeppe Kofod Islandimi Issittumi Siunnersuisoqatigiit ataatsimiinneranni aamma peqataapput.

Aamma atuaruk