Blinken qulimiguulimmik Sermersuarmeereerluni: Silap pissusiata allanngoriartornera annilaarnarpoq
Amerikamiut nunanut allanut tunngasunut ministeriat, Antony Blinkenip akunnerni tallimani Kangerlussuarmut tikeraarnini naggaserlugu qulimiguulimmik Sermersuaq qulaappaa tusagassiortunillu katersortitsillutik.
Air Greenlandip timmisartuusiviani tusagassiortunik katersortitsisoqarpoq, tassanilu Blinken, Naalakkersuisut siulittaasuata, Múte B. Egedep, nunanut allanut allanut tunngasunut silallu pissusianut naalakkersuisup Pele Brobergip aamma danskit nunanut allanut tunngasunut ministeriata, Jeppe Kofodip akornanni issiavoq.
AAMMA ATUARUK Video assillu: Blinken Kangerlussuarmut tikittoq
Nunarput Antony Blinkenip Bidenip januaarip ulluisa 20-anni præsidentinngornerata kingornatigut nunani tikeraagaasa qulingiluaraat.
- Kalaallit Nunaannut atassuteqarluarnerput pissutigalugu maaniippunga. Qanimut suleqatigiippugut siunissamilu aamma taamaaliussaagut.
- Kalaallit Nunaata kangerluisa, qaqqaasa sermillu silap pissusiata allanngoriartornerata ilungersunarnerata annertussusaanut qanorlu sukkatigineranut eqqaasitsissutissaavoq sakkortooq. Tamatumanik suleqatikkalu sermeq qulaallugu ullumi angalaarnitsinni takunninnissamut periarfissaqarpugut. Nunarsuup kissatsikkiartornerata kingunerisaanik sermip qanoq sukkatigisumik aakkiartornera takusinnaavarput.
Antony Blinken qulimiguulimmik angalaannginnermini Pele Broberg Múte B. Egede aamma Jeppe Kofod peqatigalugit Black Ridgemut angalaarput.
Qaqqami ilisimatusartoq
Tassanilu ilisimatooq, Mie Hylstofte Sisclau Winding Klima Centerimeersoq naapippaat, taassumalu nunatsinni silap pissusiata allanngoriartornera oqaluttuaraa. Sermersuarmullu isikkivimmit allanngoriartornerit ilungersunassusaat amerikamiut nunanut allanut ministerianut ersarissipput.
- Annilaarnartumik sukkassuseqarpoq. Kalaallit Nunaannimi inuit ilisimavaat. Aamma kianneruleriartornerata nunaannut allanngoriartortitsinera takunikuuaat. Maanna oqaluuseriinnarnagu tassunga tunngasumik atuagaqaannarnata takunissaanut periarfissaqarpugut. Taakkulu uppernarsititsilluinnarput, Antony Blinken oqarpoq.
Oqaaseqarnerit taakku amerikamiut naalakkersuisorisimasaannut akerliulluinnarput: Tassanimi ukiut marluk matuma siorna nunatsinnik piserusunnermik oqaaseqartoq, USA-millu nunat tamalaat akornanni isumaqatigiissutinit - ilaatigut Parisimi 2015-imi isumaqatigiissummit ilaatitsiunnaartoq præsidentiuvoq.
Trump Parisimi isumaqatigiissummit 2017-imi ilaatitsiunnaarpoq - Antony Blinkenilli pisortaata Joe Bidenip qinigaannginnermini USA isumaqatigiissummut ilaaleqqinnissaa oqaatigereernikuuaa. Tamannalu pillugu Múte B. Egede qulassuteqarpoq.
Bidenip tikinnissaa neriuutigiaa
Sooruna USA-p nunarput nunarsuarmi nunani siulliit ilaatillugu tikeraarusukkaa?
- Suleqatigiittutut atassuteqarnitsinnik maanngarluta takutitsinissaq pingaaruteqarpoq. Nunarsuup ilungersunarnerunerani asseqanngitsumillu unammillarnartoqarnerani soqutigisaqatigiillutalu naleqartitaqartigiippugut. Nunat soqutigisaqaqatitta naleqartitaqatittalu iliginerat suleqatiginerallu erseqqissassallugu pingaaruteqarpoq, taamaammat maani Kalaallit Nunaanni atassuteqarnitta annertusarniarsarivarput.
Tamanna Múte B. Egedep aamma neriuutigaa.
- Ullumikkut tikeraarneq atassuteqarnitsinni alloriarnerup tulleraa, taanna Antony Blinkenimut oqarpoq.
- Takoqqinnissannut qilanaarpunga - immaqa aamma ukiuni tulliuttuni sisamani præsidentinngornissap takunissaa.
