Kangaatsiami pisuni marlunni 27.000 literimik uuliakoortoqartoq

Nukissiorfiit Kangaatsiami innaallagissiorfianni uuliamik orsussaasivimmiit  orsussaasivimmut maqitsinermi illorsuup naqqanut, silataanut immamullu katillugit 24.000 literinik novembarip ulluisa 18-ianni unnukkut uuliakoortoqartoq. Aamma marlunngornermi novembarip ulluisa 25-anni assingusumik ajutoornermi 3 tusind literi kuuppoq. 

Uulia novembarip ulluisa 25-anni unnukkut sila taarsereersoq erngalerpoq aatsaallu aqaguani ullaakkut uuliakoorneq paasineqarpoq.

Orsussaasiviup maqitsissutaata ajoquteqalersimaneratigut taama pisoqartoq, Ovenguaq Lyberth, KNR-imut taama ilisimatitsivoq. Taanna Nukissiorfiit Qeqertarsuup Tunuani immikkoortortaata pisortara.

- Motorip ulluinnarni ingerlatigisartagaa lagertankersuarminngaanniit dagtankimik taasagarput motori illup iluaniittoq tanki illup iluaniittoq immertarnera ajoquteqalersimasoq paasivarput. Taamaalilluni motoria imaluunniit pumpia uninngitsoorluni ulikkaartoorluni kuussimasoq.

Uulia Illorsuup naqqata ataanut kooriarluni illorsuup silataanut aamma kuulerpoq, illulu sissamut qanimmat uuliakoorut immamut aamma kuuppoq.

- Uani arajutsineqarsimarpasikkami ulikkaartoq, unnukkamimi aamma. Tamakku paasiniarluarneqartarnissaat taanna siunertarivarput pitsaanerulersinnissaa, Ovenguaq Lyberth oqarpoq.

Pisup kingorna uuliakoorfik sapaatit akunnera qaangiuttoq aappassaanneerluni uuliakooqqittoq, Kommune Qeqertalimmi upalungaarsimanermut pisortaq, David Løvstrøm ilisimatitsivoq.

Suliffeqarfik taannarpiaq novembarp 25-anni aamma uuliakooqqippoq, tamatumuuna 3.000 literi missaa aamma orsussamaasivimminngaanniit innaallagissiorfiup ulluunerani ingerlatissaanut nuunneqarnerani kuuttoortoqaqqilluni.

- Taamatut ajutooqattaarnermut peqqutaassangatitaq tassaanerarpaat orsussamik maqitsilluni nussuinermi tanki immigassaq ulikkaarpat nammineerluni unittussaagaluaq akornuteqarsimagami, taamaalilluni ulikkaarpat utsersorluni aallartittussaanerani unittaataa ajutooqqammat, David Løvstrøm oqarpoq.

Tassalu uuliakoortoqareernerami, Nukissiorfimmiit paasineqarpoq suna ajoqutaalluni uuliakoortoqarsimanersoq. Taamaakkaluartoq assinganik pisoqaqqippoq.

- Taannarpiaq  massakkorpiaq Nukissiorfimmut nalunaarutigineqarpoq. Ajoquteqartoq nalunaarutigineqarsimappat sooq iluarsitinneqarsimannginnersoq, iluarsitinniarneqarsimanngippallu piaarnerpaamik iluarsitinniarneqassasoq, David Løvstrøm oqarpoq.

Kommunimi upalungaarsimanermut pisortap oqaatigaa uulia unnuami imaanut kuuttoq qanoq angitiginersoq oqaatigiuminaatsoq, nappartalli 200 literinik imaqarsinnaasut pingasut immerneqarsimasut taassuma oqaatigaa:

- Ajoraluartumilli erseqqissumik oqaatigiuminaappoq dieseli maangaannaq kuussimasoq qanorpiaq annertutiginersoq taavalu katersorneqartut literinngorlugit erseqqilluinnartumik oqaatigiuminaappoq ilaat nakkalataartagaagamik taakkualu isumannaatsumik poorlugit ikuallatassanngorlugit eqqaavimmut ingerlanneqartut taamaallaat nalunaarutigineqarpoq. 

Uulia katersorneqarsinnaanngitsoq

Imaanut kuuttoq qanoq angitiginersoq ilisimaneqanngitsoq, siaruaatereermallu katersorneqarsinnaanngitsoq, kommunimi upalungaasimasut pisortaat naliliivoq.  

- Tamakkiisumik assersorlugu assiaqutsersorlugu katersornissaanut atortussaqarnikuunngimmata taavalu anorimit malinniillu siaruarsimammat qanoq iliuuseqarfigiuminaassimavoq. Ajutoornerullu paasineqarnerani immap aalanera, silallu taarnera peqqutigalugu qatserisartut atortussaqaratillu suliarinnissinnaanerat ajornarsimavoq, David Løvstrøm oqarpoq nangillunilu:

- Nalinginnaasumik illoqarfiit arlaqanngitsuinnaat namminersorlutik oqartussanit pinngortitamut avatangiisinullu naalakkersuisoqarfimminngaanniit imaanut siaartakkanik pullattakkanik assiaqutsersuuteqarput. Nalaatsortumillu Kangaatsiap illoqarfia tamakkuninnga soqanngilaq, taavalu Aasianninngaanniit atortunik nassarluni ikiuukkiartortitsisinnaaneq imminut akilersinnaajunnaareersimammat maangaannaq kuussimasoq qanoq annertutigigaluarnersoq qanoq iliuuseqarfigineqarsinnaanngilaq. 

Paasiniaasut

Uuliakoornerli Nukissiorfiup naqqata ataanut aamma kuussimammat taanna qanorpiaq iliuuseqarfigineqassanersoq maanna sanaartornermut siunnersuisartut Masanti A/S-ip Aasianni immikkoortortaa misissuitinneqartoq, Ovenguaq Lyberth oqaluttuarpoq.

- Uku qatserisartut ittuata ernumagigamiuk imermik kuutsitsissagunik elværkip ataani qaarsoq quppaqarsinnaanera taamaalilluni imeq qerigaangami nukittoorujussuanngortarami, taamaalilluni illutaata innarlersinnaanera pillugu nalunaarusiortitsiniarluta Masantikkut attaviginikuuagut, qanorlu paasisaqarsimanersut massakkut utaqqivarput.

Tankip uuliamut maqittaat ajortissimasup kingoraartissaanik maanna inniminniisoqareersoq Nukissiorfimmiit oqaatigineqarpoq.

Kommune Qeqertalimmi upalungaarsimanermut pisortap ilanngullugu ilisimatitsissutigaa, uulia imaanut kuuttoq suneqarsinnaanngitsoq avatangiisunut pinngortitamullu naalakkersuisoqarfimmut nalunaarutigineqartoq, sumullu siaruaassimanersoq nunap assinganut nalunaarsorlugu nalunaarutigisimagitsik.