Nuussuarmi uuliakoorneq
Upalungaarsimasut uulia 8.000 literi uuliap aqqutaata Upernaviup avannaani nunaqarfimmi Nuussuarmi juulip 17-iani sisamanngornermi aserorneratigut kangerlummut aniatinneqartoq aqussinnaalerniarlugu sapaatip akunnera tamaat ulapipput.
Upernavimmi upalungaarsimasut pisortaata, Bjarne Markussenip oqarnera naapertorlugu suliassap annertussusaanut piareersimasoqarsimanngilaq.
- Atortorissaarutinik naatsorsuutigisatsinnit annertunerusunik pisariaqartitsivigut. Taakku nammineq piginngilagut, taanna oqarpoq.
Taamaammat atortunik Ilulissaniit tikisitsisoqartariaqarsimavoq. Milluaanermut atortut ilaatigut pineqarput. Atortorissaarulli uuliakoortoqarneranit sapaatip akunningajaa qaangiuttoq – tassa ippassaq aatsaat tikiunneqarpoq.
- Ilungersuanikuuvugut, pissutigalugu atortorissaarutit eqqortut sivisunerusumik utaqqisariaqaratsigit. Tamatumalu saniatigut Air Greenlandimit taamaatitsisoqarnikuuvoq, tamannalu iluaqutaasimanani, taanna oqarpoq.
Innuttaasut pakatsisut
Innuttaasut arlallit upalungaarsimasut suliaqarnerminni arriippallaarnerat Bjarne Markussenimut naammagittaalliutigisimavaat.
KNR-ip taakku ilaat sisamanngormat oqaloqatigaa: Frederik Olsen Arctic Fish Greenland A/S-imi tunisassiorfimmi pisortaavoq, taassuma aalisakkerivik uuliasunnippallaartoqarnera pissutigalugu ulluni marluinni matoqqatittariaqarsimavaa.
- Tassa ippassaanili ullut marluk matuma siornali, tusagassiuutitigut oqaatigigamikku sapusiortoqartarsimasoq piiarneqartoq, kisianni taamaattoqannginnami
Uuliakuulilllarmat naammagittaallioratta aatsaat maanna iliuuseqaqqinnialerput, taanna oqarpoq, nangillunilu:
- Upernavimmi upalungaarsimasut maanga tikikkamik, qaqorsaammik saligutaasinnaasumik immaqa imaluunnit sissaq kuerariarlugu alarnikuugamikku taamaammat susoqanngilaq, taanna oqarpoq.
Piareersimanerulissasut
Bjarne Markussenip innuttaasut pakatsinerat paasisinnaalluarpaa, upalungaarsimasulli taama nalaataqarnikuusimanngitsut erseqqissaatigaa.
- Taama annertutigisumik uuliakoortoqarnera nalaannikuunngilarput. Taamaammat atortorissaarutit pisariaqartut suli annertussusaanik isumaginnissutigisinnaasagut piginngilagut, taanna oqarpoq, nangillunilu:
- Ajutoortoqarnera ilinniarfigaarput, assingusumillu pisoqaqqeratarnissaanut maanna piareersimanerulissaagut.
Upalungaarsimasut uuliakoornermik suli suliaqaleruttorput. Uuliakoortoqarnera qaqugu aqunneqarsinnaalissanersoq Bjarne Markussenip piffissami matumani oqaatigisinnaanngilaa.
