Ittoqqortoormiini uuliakoortoqarnera: Uulia siaruaappoq

Juulip pingajuani nalunaaqutaq 10.30 politiinit allakkatigut akissuteqartoqarnerata kingorna nutaterneqarpoq: Suliap suli misissorneqarnera pissutigalugu, politiit massakkut uuliakoortoqarnera pillugu oqaaseqarsinnaanngillat.

- Maanna paasissutissiissutigineqarpoq solaari imaanut siaruaassimasoq. Tamanna videokkut inuit nittartakkakkut naapittarfiini ingerlaartinneqartumi uppernarsarneqarpoq. Kommunip videop iluumuussusaa suli naqissusersinnaanngilaa, taamaattorli ilumoorartarsinnaanera pimoorullugu.

Ittoqqortoormiini maajip 21-ani uuliakoortoqarnerata paasineqarneranit suliaq pillugu nutaarsiassami, kommuneqarfik sermersooq facebookkimi quppernermini taama allappoq.

Illoqarfimmi ajornartoornermi innaallagissiortua aqqutigalugu 22.000 literi solaari aniasimasoq, taamani politiit pingaartuisa pisortaat Preben Kleist paasissutissiivoq.

– Nukissiorfiit tankiannit uulia aniasimasoq pillugu nalunaarfigineqarpugut. Taava aamma ikuallattoqarneranut upalungaarsimanerput ilanngupparput, Preben Kleist maajimi oqaluttuarpoq.

Nukissiorfiit kiisalu oqartussaasut allat peqatigalugit uuliakoorfimmi siammatsaaliuiniarlutik suliaqarput. Mingutsitsinerup siammatsaaliornissaanut atortut suli tikissimanngillat, atortussalli pisiarineqareersimasut, Kommuneqarfik Sermersuup nalunaarutigaa

Uulia nunamiittoq imarmiittorlu attorneqassanngitsoq, Ittoqqortoormiini innuttaasunut innersuussutigineqarpoq.

- Kommunimit pisoq qanimut malinnaavigineqarpoq, suliniutinut naliliisarnernullu tunngatillugu innuttaasut ingerlaavartumik paasissutissinneqartarumaarput.

Suna uuliakoornermut pissutaasimasoq, KNR-ip politiinut apeqqutigaa. Politiit kingusinnerusukkut akissuteqassallutik neriorsorput.