Nunarput Pan-Arctic Visionimut piareertoq
Issittup Eurovisionia Pan-Arctic Vision ullumikkut aallartissaaq.
Tassani nipilersortartut qulingiluat issittumi nunap immikkoortuinit qulingiluaneersut, tamarmik immikkut erinarsuuteqarlutik, issittumi nunap immikkoortua tamakkerlugu, nipilersorneq ataatsimoornerlu nukittorsarniarlugit naapissapput.
Kalaallit Nunaata peqataatitai taassaapput Kimmernaq Kjeldsen aamma Hans Henrik Suersaq, Kimmernaq & HH taaguuteqarlutik erinarsussapput. Erinarsuut Ikusimiaq, Frederik Elsnerip qatanngutini Christian Elsner suleqatigalugu erinniaat, nunatta nalunaaqutaa malillugu nalunaaqutaq 18:00 isiginnaartitsivimmi appissapput.
- Arfininngornermut piareersaleruttorpugut, tassani Frederik Elsnerip erinarsuusiaa 'Ikusimiaq' tusarnaartitsissutigissavarput. Kalaallit Nunaanneersoq Jaqqa Petersen maani Iqalunni najugalik guitarertorissavarput. Aamma Hans Ole Amossen elektroniskiusumik nipilersussaaq sungiusaqatigaatiguttaaq. Jaqqa pikkoreqigami taamaattumik qilanaarpugut, Kimmernaq Kjeldsen oqarpoq.
Issittoq tamakkerlugu ataatsimooqatigiinneq
Pan-Arctic Vision pingajussaa ingerlanneqarpoq.
Aaqqissuussineq Nuummi Katuap siorna tunngavilersorpaa, siullermeermalli Norgemi Vadsømi pivoq.
Peqataasut unammisitsisoqarfiusumi Iqalunni Canadamiittumi ukioq manna katersuupput.
- Maaniinnitsinni assigiinngitsunik arlalinnik pisoqarpoq, pop-up-inik arlalinnik tusarnaartitsisoqallattaarluni. Kimmernaq uangalu Black Heart Cafémi tusarnaartitsivugut, tassanilu Saina Sibiriami Yakutiameersoq aamma tusarnaartitsivoq. Ullumilu (sisamanngorneq, aaqq.) Savalimmiuneersoq Dóttir nipilersorpoq, Hans Henrik Suersaq oqaluttuarpoq.
Kalaallit Nunaata saniatigut eqqumiitsuliortut Alaskameersut, Islandimeersut Savalimmiuneersullu peqataapput. Canadami Yukon aamma Iqaluit, Saamit Norgep avannaaneersut, Sverigep avannaaneersut Finlandillu avannaaneersut kiisalu Ruslandimi Murmanskimeersut Yakutskimeersullu.
- Ilumut pikkorissorujussuupput. Nammineq suliaat ilumut pitsaapput, taamaattumik qanoq tamarmik ingerlassanersut pissanganarpoq. Maani Iqalunni Issittumi inuiaqatigiittut ataatsitut misigisimasugut malugisinnaavarput, Hans Henrik Suersaq oqarpoq.
Sumiiffiup inuusuttaanit ikiorneqarneq
Nunatsinniittaaq teknikerit pingasut ilaapput, Hans Ole Amossen, Angunnguaq Larsen aamma Nukannguaq Kajussen. tusarnaartitsinerup nalaani Kimmernaq Hans Henrillu najukkami inuusuttunit 30-nit Iqalunneersunit aamma ikiorneqarput.
- Inuusuttut 30-t missaat maani Iqalunneersut peqatigalugit sungiusarpugut, taakku qilaatersussapput, tamannalu naggasiutip ilaattut atorniarparput. Tamatuma saniatigut aamma Kalaallit Nunaanni erinarsuutit assigiinngitsut arfinillit medley atorlugu tusarnaartitsissaagut, assersuutigalugu Ole Kristiansenip erinarsuutaasa ilaat, Kimmernaq Kjeldsen oqaluttuarpoq.
Angerlarsimaffimmiit Kalaallit Nunaat malinnaasinnaalernissaa qilanaaraara:
- Unamminissatsinnut piareersimalluartutut misigivugut, taamaattumik Kalaallit Nunaanniit malinnaaniarisi, Kalaallit Nunaata nalunaaqutaa malillugu arfininngorpat nalunaaqutaq arfinermut, maani Iqalunni nalunaaqutaq pingasunut.
Peqataasut nammineq erfalasutik aallaavigalugit Eurovisionimi peqataasinnaannginnertik aamma ataatsimut isigaat. Taamaattumik Pan-Arctic Vision kulturi, kinaassuseq issittumilu ataatsimoorneq qitiutillugit periarfissaassaaq.
