Pele Broberg: Blinkenip paasisariaqarpaa Danmarkiunngitsugut

Inuussutissarsiornermut, Niuernermut, Nunanut Allanut Silallu Pissusaata Allanngoriartorneranut naalakkersuisutut, Pele Broberg, ataasinngorpat ataatsimeerngaalerpoq.

Tassami naalakkersuisoqatini Amerikaminngaaneersoq, Antony Blinken, Københavnimi ataatsimeeqqatigissagamiuk. Danmarkimut timmisartup qangattanngilaataani KNR-iminngaaniit oqarasuaatsikkut ullo'qeqqanngitsoq oqaloqatigineqarpoq.

- Kalaallit Nunaanni oqartussaasugut Antony Blinkenip paasissagaa oqariartuutissama pingaarnersaraa. Nunarpassuit allat assiginngilagut. Namminiilivinnissarput piumasarisinnaavarput. Danmark Savalimmiullu assiginngilarput – Kalaallit Nunaarmiuuvugummi, Pele Broberg oqarpoq. 

Nunanut allanut Amerikamiut naalakkersuisuat Københavnimut ataasinngorpat tikissaaq. Pele Broberg kisimi ataatsimeeqqatiginagu aamma danskit naalakkersuisunut siulittaasuat, Mette Frederiksen, Marienborgimi nalunaaqqutaq qulingiluanut ataatsimeeqqatigissavaa, kinguneranilu dronning Margrethe oqaloqatigissallugu.

AAMMA ATUARUK USA-p nunanut allanut ministeria nunatsinnukassaaq

Kingusinnerusukkullu danskit nunanut allanut naalakkersuisuat Jeppe Kofod ataatsimeeqqatigissallugu.

Niuernermut tunngasunik Blinken eqqartueqatigissallugu Pele Brobergip oqaatigaa. 

- Niuernikkut periarfissat eqqartussavagut. Issittup soqutigineqaraluttuinnarnera atorluassavarput – ilaatigut tamanna Amerika niueqatiginerusinnaaneranik attaveqaatinik pilersitsinermik.

Antony Blinken Issittumi Siunnersuisoqatigiinni Reykjavimmi peqataajartorluni marlunngorpat aallassaaq. Kangerlussuarmullu sisamanngorpat tikissalluni, tassaniissallunilu nalunaaqquttap akunnerini tallimani, tassani Múte B. Egede, Naalakkersuisut siulittaasuat ataatsimeeqqatigissallugu.

Antony Blinkenip kingoraangaa, Mike Pompeo, ukiut marluk matuma siorna aamma nunatsinnukarniaraluarpoq. 

Kangerlussuaq Nuullu maajip qulingiluaani tikittussaagaluarpai, isumannaallisaasussarpassuillu piareeqqagaluarput. Tikinnissaminullu aqaguttoq taamaatiinnarpoq. 

Pompeop nunatsinnukarnissaralua Berliniliarlunilu Londoniliarneranik ilaqartumik angalangaatsiarnerusussaagaluarpoq. Kisianni Irakkiliaannarpoq.

Tamakkuali inerneraat Pompeop København siorna juulimi tikeraarmagu, tassanilu Steen Lynge, taamani nunanut allanut tunngasuni naalakkersuisuusoq, naapillugu. 

Antony Blinken USA-p nunanut allanut ministeriisa nunatsinnut tikeraartut sisamassaissavaat. 

Colin Powell, Hillary Clinton aamma John Kerry nunatsinneereerput.