USA-p nunanut allanut ministeria nunatsinnukassaaq
USA-p nunanut allanut ministeria Antony Blinken nunatsinnut sisamanngornermi maajip 20-ani tikissaaq.
Tikeraapallalaaginarnerussaarli, Kangerlussuarmiinnerami nalunaaquttap akunnerini tallimaannarniussaaq.
Tikinera Issittumi Siunnersoqatigiiffimmi ministerit Reykjavikkimi ulloq taanna atatsimiinnerisa kingunerani pissaaq.
Antony Blinkenip Naalakkersuisut siulittasuat Múte B. Egede (IA), aama qallunaat nunanut allanut ministeriat Jeppe Kofod Kangerlussuarmi ataatsimeeqatigissavai.
Taassuma tikeraarneratigut USA-p naalakkersuisuisa nunatta USA-llu attaveqatigiilluartuunerat naqissuseqqikkusuppaat. Aammali soqutigisqaqatigiissutit oqaloqatigiissutriginissaaannut piffissaqassaaq.
- Antony Blinkenip Nunatsinnut tikilluaqqunissaa qilanaaraara. Tamatuma saniatigut nunap isorartoorsuup kimmut sanilerisatta suleqatiginerata kingumut peqatigiilluta qanoq ineriartortinneqarnissaa oqaloqatigiissutigissallugu aamma qilanaaraara, Múte Bourup Egede oqarpoq.
Aamma Danmark tikeraassagaa
Nalunaaqutap akunnerani ataatsimi naapinnermi Mùte Borup Egedep Antony Blinkenillu illersornissaq sillimaniarnermilu politikki - aamma nunat malrluk taakkua Issittumi inissisimanerat ilanngullugu - oqaloqatigiissutigissavaat.
Nunatta USA- siorna oktobari naalersoq isumaqatigiissutigisaat aamma sammineqassasoq ilimagineqarpoq. Isumaqatigiissut taanna ilisimatusarnermut, niueqatigiinermut, takornariartitsisarnermut, nukissiuuteqarnermut, aatsitassanut ilinniartitaanermullu, tamarmik nunatta akisussaafigilersimasaanut, tunngavoq.
USA-p nunanut allanut ministeriata naalagaafeqatigiinni tikeragaani nunarput siulliussanngilaq. Blinkenimmi Danmarkip nunanut allanut ministeria Københavnimi Islandimut nunatsinnullu aallarnissaminut aqaguttoq ataatsimeeqatigissavaa.
Nunanut alanut tunngasuni naalakkersuip Pele Brobergip (Naleraq) Antony Blinken Københavnimi aamma ataatsimeeqatigissavaa.
Pele Broberg Københavnimi ataatsmieereeruni Reykjavikimut ingerlaqqissaq, tassani Issittumi Siunnersuisoqatigiit ministerit maajip 19-ani 20-anilu ataatsimiinnissaanni peqataassalluni. Antony Blinken, Jeppe Kofod aamma Savalimmiut nalakkersuisuisa siulittasua, Bárður á Steig Nielsen, aamma peqataassapput.
Pompeop tikeraarnissani taamaatikkaa
Antony Blinkenip kingoraangaa, Mike Pompeo, ukiut marluk matuma siorna aamma nunatsinnukarniaraluarpoq.
Kangerlussuaq Nuullu maajip qulingiluaani tikittussaagaluarpai, isumannaallisaasussarpassuillu piareeqqagaluarput. Tikinnissaminullu aqaguttoq taamaatiinnarpoq.
Pompeop nunatsinnukarnissaralua Berliniliarlunilu Londoniliarneranik ilaqartumik angalangaatsiarnerusussaagaluarpoq. Kisianni Irakkiliaannarpoq.
AAMMA ATUARUK Politiit Pompeop tikinniarunnaarnera pillugu: Uggornaq
Tamakkuali inerneraat Pompeop København siorna juulimi tikeraarmagu, tassanilu Steen Lynge (D), taamani nunanut allanut tunngasuni naalakkersuisuusoq, naapillugu.
Antony Blinken USA-p nunanut allanut ministeriisa nunatsinnut tikeraartut sisamassaissavaat.
Colin Powell, Hillary Clinton aamma John Kerry nunatsinneereerput.
Naqqiut: Antony BlinkenipPele Broberg Kangerlussuaq sisamanngorpat naapissagaa siullermik allassimagaluarpoq. Tamanna ilumuunngilaq. Blinken Broberg Københavnimi atasinngorpat ataatsimiissapput.