Politiit Pompeop tikinniarunnaarnera pillugu: Uggornaq

Amerikamiut nunanut allanut tunngasunut ministeriata tikeraarnissaanut atatillugu motorcykelit sisamat politeerpassuillu angallassisussat ininillu misissuisussat Danmarkimit tikisinneqarput. MInisterilli tikeraarnissaa taamaatiinnarneqarpoq.
Assi © : Foto: Grønlands Politi
Allattoq Christine Hyldal
maajip 08-at 2019 14:50
Nutserisoq Simon Uldum

    - Uggornaq. Tikeraartoqarnissaami piareersaateqarfigigaluarparput.

    Nunatta Politiivini chefpolitiinspektøri Svend Foldager taama oqarpoq.

    Amerikamiut nunanut allanut tunngasunut ministeriata Mike Pompeop aqagu sisamanngornermi nunatsinnut tikeraarnissaminik taamaatitsiinnarnerata kingorna taama oqarpoq. Tikinniarunnaarneranut suna pissutaanersoq paasissutissiissutigineqanngilaq.

    AAMMA ATUARUK Pompeop tikeraarnissani taamaatiinnarpaa

    Mike Pompeo Kangerlussuarmut sisamanngornermi ullaakkut tikittussaagaluarpoq, nunanullu allanut naalakkersuisoq Ane Lone Bagger (S) danskillu nunanut allanut tunngasunut ministeriat Anders Samuelsen (LA) tikilluaqqusisussaagaluarput.

    Pompeo Kangerlussuarmit Nuummut ingerlaqqittussaagaluarpoq, tassanilu Naalakkersuisut siulittaasuannit Kim Kielsenimit (S) tikilluaqquneqartussaagaluarluni. Tamatuma kingorna Pompeo, Samuelsen Baggerilu ataatsimeeqatigiittussaagaluarput kingornalu tusagassiortunik katersortitsillutik.

    Arfininngorpat Danmarkimut angerlassasut

    Tamakkuli tamaasa taamaatiinnarneqartut, KNR-imut ullaap tungaani ilisimatitsissutigineqarpoq.

    - Suleqativut Danmarkimeersut motorcykelillu sisamat tikisippagut, aamma tikeraartoqarnerata sapinngisamik pitsaanerpaamik ingerlanissaa qulakkeerniarlugu arlalissuarnik suliniuteqaraluarpugut, chefpolitiinspektøri oqarpoq.

    Politiillu Danmarkimeersut motorcykelillu sisamat aatsaat arfininngorpat Danmarkiliartinneqarsinnaassagunarput. Svend Foldagerili naapertorlugu tikeraartoqarnissaata taamaatinneqarnera pissutigalugu politeeqarfimmi eqqissisimaartoqanngilaq, politiimmi motorcykelillu sumut atorneqassanersut politiit pingasunngornermi ullup qeqqata missaani isumaliutigaat. 

    AAMMA ATUARUK USA-p nunanut allanut tunngasunut ministeria Nuulialersoq

    Taakku pisortatigoortumik tikeraartoqartillugu isumannaallisaanikkut annertuumik aaqqissuussisoqarnerani suleqataasussaagaluarput. Isumannaallisaanermullu tunngasut Svend Foldagerip itisiliiffigerusunngilai, politiilli Nuummi Kangerlussuarmi init sumiiffiillu Pompeop ornitassaata qimmit atorlugit misissuiffigineqarnissaat piareersimaffigigaluarpaat.

    Aamma ininik paarsissussaagaluarput, nunanullu allanut tunngasunut ministerip Nuup aqquserngisigut ingerlaarnerani motorcykelinik malittarisussaagaluarlugu.

    Svend Foldager naapertorlugu motorcykelinik nunatsinnut eqqussinissamut politiit danskit assartuinermut ministereqarfiannit akuerineqarsimapput.