Pompeop tikeraarnissani taamaatiinnarpaa

Amerikamiut nunanut allanut ministeriata sisamanngorpat tikeraarnissaa Nunatsinni Danmarkimilu oqartussat ulluni kingullerni ulapputigisupilussuuaat.

Tikeraarnissaali taamaatiinnarneqartoq, Namminersorlutik Oqartussani Periaasissanik aqutsisuuneq Jakob Rohmann Hard KNR-imut taama ilisimatitsivoq. Taamaatitsisoqarneranullu suna pissutaanersoq suli paasissutissiissutigisinnaannginnerarpaa.

Mike Pompep Kangerlussuarmut sisamanngorpat ullaakkut tikinnissaa pilersaarutaagaluarpoq. Nunanut allanut tunngasunut naalakkersuisup Ane Lone Baggerip danskillu nunanut allanut tunngasunut ministeriata Anders Samuelsenip tikilluaqqusussaagaluarpaat.

Pompeo Kangerlussuarmit Nuummut ingerlaqqittussaagaluarpoq, tassanilu Naalakkersuisut siulittaasuannit Kim Kielsenimit tikilluaqquneqarluni. Tamatumalu kingorna Pompeo, Samuelsen Baggerilu ataatsimeeqatigiittussaagaluarput  tusagassiortunillu kingorna katersortitsillutik.

Pompeo sulisunilu marlunngormat Berlinimut ullumikkullu Londonimut aamma tikeraartussaagaluarput. Tysklandimi kanslerip Merkelip Berlinimi ataatsimeeqatiginissaa taamaatiinnarneqarpoq amerikamiullu aallartitaat taarsiullugulu Irakiliarput. 

Mike Pompeo Amerikamiut nunanut allanut ministeriisa nunatsinnut tikeraartut sisamassarigaluarpaat. Colin Powell, Hillary Clinton aamma John Kerry siornatigut nunatsinnut tikeraarnikuupput.