USA-p nunanut allanut tunngasunut ministeria Nuulialersoq
Nunanut allanut tunngasunut ministerip Mike Pompeop sapaatit akunnerata tulliani nunatsinnut sivikitsumik tikeraartussanngornera Amerikap nunanut allanut ministereqarfiata nittartakkamini pingasunngornermi unnukkut paasissutissiissutigaa. Tikittussanngorneralu KNR-ip uppernarsartippaa.
Mike Pompeop Naalakkersuisut siulittaasuat Kim Kielsen (S), danskit nunanut allanut tunngasunut ministeriat Anders Samuelsen aamma nunanut allanut tunngasunut naalakkersuisoq Ane Lone Bagger (S) ataatsimeeqatigissavai.
Amerikap nunanut allanut tunngasunut ministereqarfia naapertorlugu taakku pingasuullutik "Issittumut tunngatillugu pingaarnersiuinissaq Kalaallit Nunaannilu suliaqarfiup annertusarnissaanut periarfissat oqaloqatigiissutiginiarpaat”.
Mike Pompeo aamma Kangerlussualiassaaq, tassanilu New York Air National Guardimeersut naapissavai.
Issittumi Siunnersuisoqatigiit Finlandimi Rovaniemi sapaatit akunnerata tulliani ataatsimiinnerminit angerlarnissani iluatsillugu Nuummut tikissaaq.
Merkel Mayilu aamma naapissavai
Pompeo angalanermini aamma marlunngorpat Berliniliassaaq, ilaatigut Angela Merkel ataatsimeeqatigisaallugu. Pingasunngorpallu aamma Londoniliassaaq premierministeri Theresa May ataatsimeeqatigiartorlugu. Sisamanngorpallu tassa Nuuliassaaq.
Ataatsimiinnermi soorpiaat oqaloqatigiissutigineqassanersut ilisimaneqanngilaq.
Mike Pompeo Amerikamiut nunanut allanut tunngasunut ministeriisa nunatsinnut tikeraartut sisamassaraat. Siornatigut tikeraartut tassaapput. Colin Powell, Hillary Clinton aamma John Kerry.
Amerikamiut Issittumiinnerminnik nukittorsaarusullutik isertuutinngilaat, tamannalu Kinamut Ruslandimullu erseqqissumik tamatuminnga ersersitsiniartut isigineqassaaq.
Mike Pompeo Islandimi februaarip qaammataani tikeraarnermini taama aamma oqarpoq. Islandimi ministeriuneq Katrín Jakobsdóttir aamma nunanut allanut tunngasunut ministeri Guðlaugur Þór Þórðarsson taamani ataatsimeeqatigiai illuatungeriillu niuernikkut suleqatigiinnertik nukittorsarniarlugu isumaqatigiissutigaat.
Sermitsiaq taama allaaserisaqarpoq.
Islandip soqutigineqarnerata annertusinerata nunap pilersaarusiornermut tunngatillugu Issittumi inissisimalluarneranik pissuteqartoq Mike Pompeop aamma isertuutinngilaa.
