Blok 17 ikuallappoq - aasit
Qatserisartut biilii pingasut Nuummi Qapiarfiusaami blok 17-imut arfininngornermi ullup-qeqqata kinguninngua apuupput.
Inissiaq qullerpaap tullianiittup igalaavinit marlunnit pujuliortoqarpoq.
KNR-ip nutaarsiassaqartitsiviata Thomas Sandgreen naapippaa. Taanna ikinngutini ilagalugu niuerniartarfiliarniarluni pujoq takuaa.
- Biilinut ikiartortilluta ikinngutima nilliaffigaanga: Pujoqarpoq, ikuallappoq! Taava tappavunga arpalluta matumut kasuttoriartorpugut inuillu aniaqqullugit.
Inissiami ikuallattumi matu ammarneqanngimmat matu isimmillugu ammarpaa. Akisoqanngimmalli pujorlu ussippallaarmat anillapallapput.
Inissiaq majuartarfeqarfik J-imiittoq ikuallattoq, Thomas Sandgreen oqaluttuarpoq. KNR-ip tamanna Kalaallit Nunaata Politiivinit suli uppernarsiniarsaraa.
Ikuallannermut suna peqqutaanersoq imaluunniit qanoq annertutigisumik ikuallattoqarnersoq KNR-ip suli paasinngilaa.
Kalaallit Nunaata Politiivinit oqaaseqartitsiniarsarivugut, suliarlu malinnaaffigaarput.
Inissiaqarfimmi tassani kingullermik ikuallattoqarneranit qaammat ataaseq affarlu qaangiupput.
