Ilisimatooq maannamut qineqqusaarneq pillugu: Ukkatarinniffiunngitsoq erserinngitsorlu

- Sammisamik aalajangersimasumik ukkatarinnittoqanngilaq. Sammisanik qulequttanik tamanik tigusisunik aamma eqqartuisoqanngilaq. Qineqqusaarnermi unammineq siammasilaarpoq.

Ilisimatusarfimmi inuiaqatigiilerinermi ilisimatooq, Rasmus Leander oqarpoq.

Qinersisoqarnissaa februaarip ulluisa 16-ianni suaarutigineqarpoq. Ullullu taassuma aqaguani qineqqusaarnermi sammisat pingasut pingaarnerusussat Rasmus Leanderip KNR-ip erseqqissaatigai: Tassa Kuannersuarni aatsitassarsiornissamik suliniut, aalisarneq mittarfinnillu sanaartorneq. 

AAMMA ATUARUK Nalilersuineq: Urani qineqqusaarnermi eqqartorneqangaatsiassaaq 

Marsip ulluisa 26-at maanna tikipparput. Partiit tamarmik qineqqusaarutissatik saqqummiuppaat. Siumup Inatsisartunut qineqqusaarutaa quppernernik 26-nik takissuseqarpoq, tassanilu ineqarneq, utoqqaat, nammineq piginnilersitsineq, oqaatsit, ilinniartitaaneq ilaqutariinnullu politikki ilaatigut sammineqarput.

Naleqqap Inatsisartunut qineqqusaarutaa quppernernik 17-inik takissuseqarpoq, tassanilu sammisat aamma taama annertutigipput.

Qineqqusaarnermi sammineqartoq aalajangersimasoq nutaaq ilisimatuup eqqaamalluarpaa – tassa kommunit amerlassusaat allanngorteqqinneqassanersut.

Kisianni, ilisimatooq oqarpoq:

- Qineqqusaarnernili – aamma nunatsinniinnaanngitsoq – pingaarnerit kingulliunneqartarnerat nalinginnaasuuvoq. Qinersinissalli poorskeqqammitsiarnerani pisussaanera ajornartorsiutaaginnarpoq – taamaammat qinersisussat tamarmik kaffisoriarsimanngikkunik qaqqamut pisuttuarsimanngikkunik malinnaanatillu taama sapaatip akunnera annaaneqassaaq.

Uranip IA Siumullu avissaangatikkai

Ilisimatuup uranimut tunngasoq initunerussasoq naatsorsuutigigaluarpaa. Sammisarmi taanna nunatsinni partiit annerpaavisa Siumut aamma Inuit Ataqatigiit immikkoorutingaatsiarpaat.

- Uranimut tunngatillugu sammisap oqallisigineqannginnissaa Siumup soqutigisaaniippoq, pissutigalugu qineqqusaarnerup aallartinnginnerani partiip iluani sammisaq pillugu isumaqatigiinngittoqarmat. Taamaattoqarpalli Inuit Ataqatigiit nunatta kujataani qinersisartunik pissarsiarlutik ilungersuuteqarsinnaassagaluarput, Rasmus Leander oqarpoq.

AAMMA ATUARUK Erik Jensen: Siumup Kuannersuarni aatsitassarsiortoqarnissamut periarfissarsiornissaq anguniagarivaa

Nunatta kujataani Kuannersuit Narsamit 8 kilometerit missaannik ungasissuteqartumiippoq.

Australiamiut aatsitassarsiutileqatigiiffiat, Greenland Minerals Kuannersuarni aatsitassanik qaqutigoortumnik piiaalerusuppoq. Aatsitassat qaqutigoortut anorisaatinut biilinullu innaallagiatortunut batterinut ilaatigut atorneqartarput.

Aatsitassalli qaqutigoortut piiarneranni uranimik aamma piiaasoqassaaq, tamannalu nunatta kujasinnerpaartaani kommunimi innuttaasut kamaatigaat. Tassanimi innuttaasut mingutsitsisoqarnissaa sapusiallu sinnikunut eqqaaviusup ilaatigut uranimik eqqaavisup Tasermut aserorsinnaanera ernummatigaat.

AAMMA ATUARUK Inuit Ataqatigiit: Siuttunngussagutta Kuannersuarni suliniut unitsissavarput

Suliniut piffissami matumani tusarniaassutigineqarpoq – taamaammat Greenland Mineralsip Kuannersuarni aatsitassanik qaqutigoortunik piiaanissaa akuersissuteqarfigineqassanersoq suli ilisimaneqanngilaq.

Qinersisartunut nikisitsisoqangaarunanngitsoq

- Qinersisartunik qineqqusaarnermi piffissami matumani nikittoqarpallaarsorinngilara, Rasmus Leander oqarpoq.

- Inunnut sulianullu ataasiakkaanut qinersinerni nikittoqarsinnaavoq. Paasititsiniaalluarnerit taasisussanik nikisitsisinnaapput. Qineqqusaarnerli ersarinngilaq, taamaammat qinersisartunik nikittoqarnersoq apeqqutaavoq.

Sulili naammassinngilaq – suli sapaatit akunneri marluk periarfissaapput. Sammisanik qineqqusaarnerup maanna naggataani eqqartugaalersoqassasoraajuk?

- Nunatta kujataani maanna qineqqusaartoqalerpoq. Taamaammat uranimut tunngasoq sammineqassaaq. Tassanilu nuiumanerusut saqqummissapput. Taamaammat taakku qineqqusaassapput. Taamaalilluni qaffasinnerulaassalluni, Rasmus Leander oqarpoq.

Qaqortumit Inatsisartunut unnugu qineqqusaartoqassaaq. Tamanna KNR1-ikkut nalunaaqutaq 19.30-mit malinnaaffigisinnaavat.

Kommunimut qineqqusaarnerit qinersinissamullu oqallinnerit Nuummi GUX-imit apriilip ulluisa pingajuanni arfininngornermi nalunaaqutaq ualikkut pingasunut aamma sapaammi apriilip ulluisa sisamaanni nalunaaqutaq pingasunut ingerlanneqassapput. Tamanna KNR1-ikkut aamma malinnaaffigisinnaavat.

Nuummi Inatsisartunut qinersinissamut oqallinneq marsip ulluisa 29-anni, 30-anni 31-annilu aamma KNR-ikkut malinnaaffigisinnaavatit. Ullut taakku tamarmik nalunaaqutaq 19.30-mit aallakaatitsisoqassaaq.

Partiit siuttui apriilip ulluisa tallimaanni nalunaaqutaq 19.30 apeqqarissaarfigineqassapput.