Erik Jensen: Siumup Kuannersuarni aatsitassarsiortoqarnissamut periarfissarsiornissaq anguniagarivaa
Kuannersuarni aatsitassarsiorniarneq inatsisinut naapertuuppat qanoq pisoqassava? Apeqqut taanna Siumup siulittaasuata, Erik Jensenip, sapaatit akunnerata siuliani erseqqissumik akinngilaa. Siulittaasorli erseqqissumik maanna nalunaaruteqarpoq.
- Siumup Kuannersuarnut tunngatillugu anguniagarivaa, taassuma periarfissap pilersinneqarnissaata ujartuiffigineqarnissaa, Erik Jensen oqarpoq, nangillunilu oqarluni, aatsitassarsiornermut inatsimmi pinngortitamut, avatangiisinut inunnullu innarliinnginnissamik malittarisassat malinneqarpata aatsaat pilersinneqassasoq.
Taamalu oqarnini sapaatit akunnerata siuliani oqarnerminit allaanerunngitsoq siulittaasoq isumaqarpoq. Tassani partiip anguniagaanut innersuussivoq, apeqqulli taanna Siumumi naammattumik oqallisigisimanngikkitsik oqaatigalugu.
AAMMA ATUARUK Siumut vil udskyde afklaring om Kuannersuit til efter valget
Aatsitassarsiornermi inatsit malinneqarpat, nunatsinni sumi tamaani aatsitassarsiornissamik suliniutit aallartinneqassasut, tassani oqarpoq. Kuannersuarnili suliniut tassunga allaaneruvoq:
- Ilutsinni eqqartorluarnera suli annertunerusariaqarpoq. Ataatsimeersuarnermi suliniut taanna kisiat pillugu eqqartuinerput annikippallaarsimasoq nassuerutigisinnaavarput. Taamaattumik ilutsinni qanimut eqqartuilluarnitsigut isummersorfiginissaa ingerlateqqaalaartariaqaripput isumaqarpunga, Erik Jensen sapaatit akunnerata siuliani oqarpoq.
Oqaaseqaataasa siulii isornartorsiorneqartut
Inuppassuarnullu avissaartuussutaasoq pillugu erseqqissumik isumminnginnera Inuit Ataqatigiit kingorna isornartorsiorpaat. Aamma Kim Kielsenip nammineq partiini Sermitsiamit apersorneqarnermini taama isornartorsiorpaa.
AAMMA ATUARUK Inuit Ataqatigiit: Siuttunngussagutta Kuannersuarni suliniut unitsissavarput
Erik Jensenip sapaatit akunnerata siuliani oqaatsini eqqaamavai, isummamilli allanngortitseriataannginnerarpoq. Partiip anguniagai malillugu maanna oqarpoq.
Qanoq ikkaluarpalluunniit taava Siumup Kuannersuarni aatsitassarsiornissamut isumaa partiip ataatsimeersuarnerata kingorna nalornissutigineqarpoq. Demokraatillu naalakkersuisoqatigiinnit tunuaramik suliap nalornissutaanera tunngavilersuutigaat.
Innuttaasulli suliniummit avissaartuutsinneqarnissaannik pinngitsoortitsiniarneq, coronavirusimullu atatillugu killilersuutit peqqutaasut Erik Jensen oqarpoq. Taavalu aamma ilisimatuussutsikkut allagaatit nalornissutaallutik. Taamaammat suliniutip tusarniaassutigineqarnera sivitsoqqugitsik, Erik Jensen oqarpoq.
Kujataanili oqallittoqaqisoq taassuma paasilluarsinnaavaa.
Suliniutillu tamatuma nunatsinni avissaartuussutaammat Kuannersuarnut tamakkiisumik pilersaarusiornissaq Demokraatinut siunnersuutigisimagaluaritsik taanna oqarpoq.
Siumumut ilaasortat tapersersuisariaqanngitsut
Kuannersuarni suliniut qineqqusaarnermi oqallisigineqarlualereerpoq. Siumumiilli qineqqusaartumut taaguussineq uranimik piiaanissamut akuersisumik taaguussinerusariaqanngilaq.
- Imaanngilaq uranimut naaggaaraanni taava Siumuujunnaartoqassasoq. Siumuulluartorpassuaqarpoq, uunga qulequttamut tunngassuteqartumut allamik isummeraluarlutik Siumuuginnartunik. Sinerissamilu taamaattut amerlasoorpassuupput.
- Qulequttamut ataasiinnarmut isummeraanni taava Siumuujunnaarnermik isumaqassappat, taanna soorunami namminneq aalajangigassarivaat. Kisianni taamaaliunngillat, isummerput, taannalu ataqqivarput, Erik Jensen oqarpoq.