Tamaat isigalugu: Naleqqap uku qineqqusaarutigissagai

Sinerissap qanittuani aalisarneq.

Nakorsanik namminersortunik kikkulluunniit nakorsiartarfianiinnaanngitsoq passutitinneq.

Inissiamik ukiut 30-t attartorsimagaanni piginnittunngorsinnaaneq.

Kalaallip kinaaneranik erseqqissaaneq.

Kommunerujussuillu immikkut kommuninngoqqinnissaat.

Tamakku Naleqqap kommunimut Inatsisartunullu qineqqusaarutaasa ilamininnguarai.

Nakorsat peqqissaasullu Danmarkimeersuinnaanngitsut

Peqqinnissaqarfiup aaqqissugaanera aallarniissutigeriartigu. Nakorsat peqqissaasullu Danmarkip avataaneersut nunatsinnut suliartorsinnaasariaqartut, partii isumaqarpoq.

Nakorsat namminersortut passussinissaminnut soorlu seeqqukkut suliarinninnissamut neqeroorsinnaasariaqarput. Utaqqerujussuaqqaarani nakorsiarsinnaanngornissamik siunertaqartoq, Pele Broberg oqarpoq. 

Taanna Inatsisartuni Kommuneqarfik Sermersuumilu qinigassanngortippoq. 

Danmarkip naalagaaffianiit nakorsat peqqissaasullu avataaniit nunatsinnut suliartussappata akuersissuteqaqqaartussaapput. Tassa Danmarkimi sulisinnaasutut akuersissuteqassapput.

Taamaakkaluartoq nakorsat USA-meersut, Asiameersut, Skandinaaviap nunaaneersut Tysklandimeersullu nunatsinni akuerineqartariaqartut, Pele Broberg oqarpoq. 

- Amerlasuut tuluttoorluarsinnaapput. Tuluttut oqaluttumik nakorsiarsinnaalluarput, taanna oqarpoq.

Napparsimmaveqarfiup saniatigut nakorsat namminersortut passussisinnaalerpata, assersuutigalugu seeqqunik suliarinnissinnaalerpata, nakorsialertupallassinnaanermik malitseqassasoq ilimagineqarpoq. Nakorsiartut nammineerlutik akiligarinngisaanik pisortaqarfimmiilli akilerneqartumik. 

Nakorsat passussisinnaasut amerlanerulernissaat siunertaavoq. Passunneqapallakkaannimi sukkanerusumik sulileqqittoqarsinnaassaaq. Tamanna aningaasarpassuarnik sipaarutaasinnaasoq Naleqqamiit oqarput. 

Peqqinnissaqarfinni ingammik nunaqarfeeqqani inuttalersoruminnaatsuni sulisussarsiornissaq, peqqinnissaqarfimmiut nammineerlutik qanoq pilerisaarissanerlutik iliuuseqarfigiinnassagaat, Naleqqamiit naliliipput. 

Inissiamik attartortutut piginnittunngorsinnaaneq

Inuunerup affaa imaluunniit ukiut 30-t missaanni inissiamik attartortuusimagaanni piginnittunngorsinnaanissaq periarfissaasariaqarpoq. 

- Taamaasinikkut suliffik aqqutigalugu inigineqartunut nutartigassaasunullu pisortat aserfallatsaaliinissaat annikillisaaffigineqarsinnaavoq, Pele Broberg oqarpoq. 

1,5 milliardit koruunit nalinganut inissianik nutarsaanissamut amigartooruteqartoqarnera KNR-ip allaaserereernikuuaa.

Inissiamik attartortut piginnittunngornissaanit neqerooruteqarneq, nutarterinissamut aningaasartuuteqannginnissamik siunertaqannginnerluni? 

- Attartortut nammineerlutik piginnittunngussanerlutik piginnittunngussannginnerlutilluuniit aalajangissavaat. Amerlanertigut inissiat pineqartut tassaasarput pisortanit aningaasartuutaasimanngitsut, tassami Namminersorlutik Oqartussanut Danmarkip naalagaaffianiit tunniussaammata. Sivisuumik inissiaminnik attartorsimasunut piginnittunngorsinnaanissamik aaqqiissuteqarusuppugut, Naleraqqameersut oqarput. 

Sinerissap qanittuani aalisarneruneq

Aalisartut biologillu suleqatiginerisigut sinerissap qanittuani aalisarneq Naleqqameersunit tapersersorneqarusuppoq.

Sinerissap qanittuani aalisarnermi avataani aalisarnernut pisassiissutinut nuutitsisoqartarunnaassaaq. Paggatassiissutigalugit aalisagartassiissutit aamma nalileqqinneqartariaqarsoraat.

Ilaqutariinnut amerlanerusunut iluaqutaaqqullugu sinerissap qanittuani aalisarneq salliunneqartariaqartoq Naleqqameersut oqarput. Avataasiorluni aalisarneq sinerissap qanittuani aalisarnermut ajoqutaassappat, avataasiorluni aalisartunut pisassiissutikinnerulernermik malitseqarsinnaavoq. 

Kina kalaaliua? 

Tamanna allattorsimasuutiginngilarput, tamannalu akerleriissuteqalernermik pilersitsisartoq, Naleqqameersut oqarput.

- Namminersortunngorutta kinaanerluta nalunngittariaqarparput. Massakkut kinaassuserput ersarippallaanngilaq aaqqittariaqarporlu. Allanut sanilliussinermi kikkuunerluta nalunngittariaqarparput. Danmarkip naalagaaffiani innuttaasunngorniaraani misilitsittoqaqqaartarpoq, Avannaata Kommuniani qinigassanngortittoq, Jens Napâtok oqarpoq.

- Qitornagut maani inunngorput, maanilu najugaqarpugut. Kisianni aamma avataaniit tikittorpassuaqartarpoq najugaqalersartunik, taakkulu aamma maani qitorniorput. Taakku aamma kalaaliupput. Maanimiuuginnartussaappat aallaqqissappalluunniit? Amerlasuut maanimiuugaluarlutik susoqarnersoq nalusarpaat. Inuit toqqammaveqartariaqarput, Jens Napâtok oqarpoq.

Kommunit amerlanerusut: 

Taamaattoqartuaanarsimanngikkaluartoq nunatsinni ullumikkut kommunit tallimaapput.

Kommunit 18-iusimaut sisamaananngortinneqarlutik 2009-mi kommunikkut aaqqissuusaaneq nutaaq atuutilerpoq. Qaasuitsup Kommunia kommuninut marlunnut kingusinnersukkut avinneqarpoq.

Naleqqameersullu isumaqarput kommunit amerlineqartariaqartut. 

Tamanna taasissutigineqassasoq partiimit piumasarineqarpoq, aatsaalli tamanna pissaaq pitsaaqqutaanik ajoqutaanillu paasititsiniaareernerup kingorna.