HIV-p tunillaassuunnera mianersoqqussutigineqartoq
Nunarput HIV-ip tuniluunneranik eqqugaaqqippoq. Tuniluuttullu siaruaannerunissaa annertuumik ernumalersitsisoq, Nunatsinni nakorsaaneq Henrik Hansen oqarpoq.
- Ernumanaateqartupilussuuvoq, tunillatsittoqarsimaneranimmi paasisaqartuarpugut, tunillatsissimasullu tallimaanerat Kalaallit Nunaata inuttussusianut naleqqillugu amerlapput, aamma inuusuttut pineqarmata immikkut ernumanaateqarpoq, nunatsinni nakorsaaneq oqarpoq.
Tunillatsissimasutut paasineqartut nutaat tallimat nunatsinni HIV-mik tunillatsissimasunik paasineqartartut agguaqatigiissillugit utoqqaassuserisartagaannit inuusunnerupput. Nunatsinni nakorsaaneq naapertorlugu misilittakkat takutippaat taama ukiullit utoqqaanerusunut sanilliullugit arlalinnik atoqateqartartut, taamaattumillu tuniluunnissaa aarlerinaateqarnerulluni.
AAMMA ATUARUK Syfilis giver ekstra arbejde for sundhedsvæsenet
Innuttaasullu atoqateqarnerminni illersuuteqartannginnerat Henrik Hansenip erseqqinnerusumik nassuiaatissaqartinngilaa.
- Ukiummi ingerlanerini annertuumik paasititsiniaasoqartarpoq, aamma Kalaallit Nunaanni periarfissat pitsaasuupput usuup puuinik akeqanngitsumik pissarsisoqarsinnaammat peqqinnissaqarfimmilu akeqanngitsumik misissortittoqarsinnaalluni, nunatsinni nakorsaaneq oqarpoq.
Taamaakkaluartorli usuup puuinik atuinngitsoortoqartarpoq, tamannalu arlalinnik kingunerlutsitsisarpoq, nunatsinni nakorsaaneq erseqqissaavoq.
- Ajornartorsiutaajuarnera takusinnaavarput, aamma Kalaallit Nunaanni syfilisi maannakkorpiaq ajornartorsiutaaleraluttuinnarpoq.
AAMMA ATUARUK Syfilis tuniluuppoq
Nunatsinni nakorsaaneqarfiup maannamut nalunaarutigineqartut naapertorlugit ilimagaa 2018-imi syfilisimik nappaateqartut 100-it sinningaatsiassagaat. HIV-llu taamatut aamma tuniluussinnaanera aarlerinaateqartoq nunatsinni nakorsaaneqarfiup paasissutissiissutigaa imatullu kajumissaaruteqarluni.
- Nappaatit atoqatigiinnikkut tuniluuttartut ajornartorsiutaanerat pimoorulluinnartariaqarpoq. Inummummi ataasiakkaamut inuiaqatigiinnullumi annertuupilussuarmik kingunerlutsitsisinnaapput, nunatsinni nakorsaaneq Henrik Hansen oqarpoq.
Nunatsinni HIV-mik tunillatsissimasut ullumikkut 70-it missaanniittut inuunertik tamaat peqqinnissaqarfimmit nakkutigisaallutillu nakorsagaassapput. Suliassarlu taanna peqqinnissaqarfimmut suliassaavoq annertooq, nunatsinni nakorsaanerup oqaatigaa.
HIV-mik nappaatinillu atoqatigiinnikkut tuniluuttartunik allanik tunillatsissinnaaneq pitsaaliniaraanni illersuuteqarluni atoqatigiinneq periarfissatuaavoq – imaluunniit atoqateqassanani inuulluni.
AAMMA ATUARUK Nukappiaraq syfiliserluni inuusoq
AAMMA ATUARUK Syfilisertut aatsaat taama amerlatigisut
AAMMA ATUARUK Syfilisip atugaaqqilernera mianersoqqussutigineqartoq