Syfilisertut aatsaat taama amerlatigisut
Nunatsinni syfilisimik nappaateqartutut nalunaarutigineqartut ukioq manna 75-iupput. Taamaattoqarneratigullu ukioq naaqqajanngitsorluunniit ukioq 2018 rekordiliiffiuvoq.
Nunatsinnilu nakorsaaneq Henrik L. Hansen tamanna pissutigalugu mianersoqqussuteqarpoq:
- Syfilisimik nappaatillit ernumanaatilimmik amerliartornerat takusinnaavarput. Inunnut ataasiakkaanut nunatsinnilu ineriartornermut ajoqusiisumik nappaatip atugaanera annertusiartuinnaqqunagu unitsinnissaanut kikkut tamarmik ikiuunnissaat pingaaruteqarpoq, Nunatsinni nakorsaaneq Henrik L. Hansen tusagassiorfinnut nalunaarummi taama oqarpoq.
Tasiilamilu ingasannerpaavoq, innuttaasummi amerlassusaannut naleqqiukkaanni tunillatsissimasut amerlanerupput. Tasiilami taassumalu pigisaani innuttaasut 3000-it missaanniittut akornanni nappaatipalaamik tunillatsissimasut septembarip qaammataani quliupput. Tassalu innuttaasut 1000-iugaangata 3,4-t tunillatsissimasutut nalunaarutigineqarsimallutik.
Tunillatsissimasut Tasiilami amerlanersaapput, Nuuk, Sisimiut Ilulissallu tulliullutik. Nalunaarutigineqartut amerlanersaat tassaapput inuusuttut 20-t 29-llu akornanni ukiullit, nalunaarutigineqartullu amerlanersaat arnaapput.
Syfilis nappaataavoq navianartoq pingaarnertut atoqatigiinnikkut tuniluuttartoq. Atoqatigiinnikkut syfilisimik tunillatsinneq sapaatit akunneri pingasut ingerlaneranni kinguaassiuutini ikeqalernikkut ersiuteqalersarpoq. Ikeq manngertutut ippinnanngitsutullu malugineqarajuppoq, Nunatsinni nakorsaaneqarfik taama ilisimatitsivoq.
Nappaat nakorsarneqanngikkuni tappiorannartoq aammut akuliulluni timimut siaruaassinnaavoq qaammatillu ataatsip marlullu akornanni qaangiukkaangata kissarneqalerneq, niaqorlunneq, timi tamakkerlugu aniornininneq ameraasatigullu assigiinngitsunik allannguuteqarneq ersiutaalersarlutik
Nappaat nakorsarneqanngitsoq qaammatiniit ukiup ataatsip ingerlanerani anigugassaanngitsumik qaratsakkut qiteralikkullu aseruuttoorninnguussinnaavoq.
