Greta Thunberg avatangiisit pillugit nersornaaserneqarnissaminut itigartitsisoq
Svenskeq, avatangiisinik illersuiniartoq, Greta Thunberg Nunat Avannarliit Siunnersuisoqatigiiffiata avatangiisit pillugit nersornaasiuttagaannik 2019-imi nersornaaserneqarpoq, Nunat Avannarliit Siunnersuisoqatigiiffiat tusagassiuutinut nalunaaruteqarput.
Greta Thunbergilli nersornaat Stockholmimi marlunngornermi unnukkut aaqqissuussinermi tunniunneqartoq tigorusunngilaa.
Greta Thunbergip avatangiisinut illersuiniartut allat marluk nersornaasiinermut ornigutsippai.
AAMMA ATUARUK Greta Thunberg Naalagaaffiit Peqatigiinniinnermini kamattoq: Meeraanera tillipparsi
- Nunani iliuuseqarnerpaasinnaasuni ilaavugut, tunngaviusumilli iliuuseqanngilagut.
- Iliuuseqartoqarnissaata tungaanut uanga Sverigemiluunniit Fridays for future (Thunbergip avatangiisit pillugit eqeersaanera aaqq.) Nunat Avannarliit Siunnersuisoqatigiiffiata avatangiisit pillugit nersornaasiaanik tigusinianngilagut, avatangiisinik illersuiniartoq, Greta Thunberg sinnerlugu aaqqissuussinermi najuuttoq oqarpoq.
16-inik ukiulik, Greta Thunberg silap pissusia avatangiisillu pillugit nunarsuarmi oqallitsitsinini pillugu nersornaaserneqartoq, nersornaasiinermi aalajangiisut nassuiaatigaat.
Tamatumalu saniatigut nunarsuarmi inuit millionikkaat politikerinut iliuuseqartitsiniarnissaannut isummersissimavai.
AAMMA ATUARUK Thunbergip atuanngitsoortarnera silap kianneruleriartorneranut ilungersuutiginnissutaalersoq
Nersornaaserneqartut nersornaaserneqarnerminni 350.000 koruuninik aamma aningaasannattarput. Greta Thunbergillu aningaasat taakku tiguniarnagit Instragramimi quppernermini oqaatigaa.
Nunat Avannarliit Siunnersuisoqatigiiffiata nersornaasiinissaannut kalaallit sisamat nersornaaserneqarnissamut innersuunneqarsimapput.
Meeqqanut inuusuttunullu atuakkiani Camilla Sommerip Pernille Kreutzmannillu atuakkiaat Tuttuarannguaq innersuunneqarpoq, nipilersortartuni Da Bartali Crew innersuunneqarluni, avatangiisit pillugit Plastic not so fantastic innersuunneqarluni kiisalu Pivinnguaq Mørchip atuakkiaa Arpaatit Qaqortut atuagassialiornermi innersuunneqarluni.
AAMMA ATUARUK Tuttuarannguaq pillugu atuakkiaq nersornaasigassatut innersuunneqartoq
AAMMA ATUARUK Plastic Not So Fantastic nersornaasigassatut innersuunneqartoq
Nunanili avannarlerneersut allat nersornaaserneqarput.
