Thunbergip atuanngitsoortarnera silap kianneruleriartorneranut ilungersuutiginnissutaalersoq

Ullumi marlunngornermi ukioq ataaseq qaangiuppoq silap pissusaa pillugu ilungersuutiginnittup Svenskip niviarsiaqqap Grete Thunbergip atuarfimmi atuarumajunnaartarnini aallartikkamiuk, politiikerit paasitinniarlugit silap pissusaata allanngoriartornera pillugu iliuuseqarnissaannik oqariartuuteqarluni.
Silap allanngoriartorneranut ilungersuutiginnittup Greta Thunbergip atuarumajunnaaqqaarnermini politikerit tusarlerniarpai. Assi © : Denis Balibouse / Reuters / Ritzau Scanpix
Allattoq Ritzau
aggustip 20-at 2019 09:48
Nutserisoq Jaaku Lyberth

Greta Thunberg silap pissusaata allanngoriartornera pillugu kisimiilluni akerliussutsimik takutsitsiarnera inupassuarnut sunniuteqarpoq.

16-nik ukiullip Greta Thunbergip atuarfimmi tallimanngornerit tamaasa atuarumajunnaartarnini siorna septemberip qaammataani aallartippaa, taaguuteqartillugu, "Friday for Future " siunissaq pillugu atuanngiffik, silap pissusaata allanngoriartorneranit unammilligassat politikiinerinit pimoorunneqarnissaa paasitikkusullugu.

Akerliussutsimik takutitsilluni atuarumajunnaartarneq nunani allani aamma atorneqalerpoq. Nunarsuaq tamakkerlugu marsimi 2019-mi atuartut atuarumajunnaarmata, nunani assigiinngitsuni 135-ni atuartut to milliuuninik amerlanerusut atuarumajunnaarput.

Greta Thunberg nunarsuarmi assigiinngitsuni politikerinut atorfikkaanullu oqalugiartarpoq.

Svenskeq 16-inik ukiulik nobelip nersornaasiuttagaanik nersornaaserneqarnissaanik innersuunneqarpoq.

Amerikamiullu atuagassiaanit Time-mit nunarsuarmi sunniuteqarnerpaat ilaattut taaneqarluni.

Thunberg ullorpassuit atuanngitsoorfeqaraluarluni meeqqat atuarfianni tunngaviusumik atuarneq naammassivaa, maannalu ukioq ataaseq atuanngiffeqarniarpoq silap pissusaa pillugu tamakkiisumik aallussiniarami.

Thunberg maanna imarpik ikaarlugu angallammik Amerikamut ingerlaarpoq, New Yorkimilu silap pissussaa pillugu ataatsimeersuarnissami septemberip qaammataani pisussami peqataassalluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk