Kalaallit Nunaannik piginninneq Donald Trumpimut "pingaaruteqartorujussuuvoq".

Tamanna USA-p præsidentiata Amerikamiut aviisiannit The New York Times-imit apersorneqarnermini erseqqissaqqippaa.

Tassani sooq Kalaallit Nunaata pigilernissaa pisariaqartinnerlugu aamma sooq USA-p Danmarkillu qeqertamut Issittumiittumut sakkutooqarnikkut isersinnaanerminnik isumaqatigiissuteqarsimanerat naammannginnersoq nassuiarpaa.

- Misigisimagama eqqarsartaatsikkut iluatsilluassagaanni tamanna pisariaqartoq, Trump oqarpoq.

Attartornermut isumaqatigiissummit angerfigeqatigiissummilluunniit pissarsiarineqarsinnaanngitsunik piginnittuuneq pissarsiarinnissinnaasoq taanna isumaqarpoq.

- Piginninneq allakkatigut atsiornikkut pissarsiarineqarsinnaanngitsunik tunissuteqartarpoq, USA-mi præsidenti oqarpoq.

USA-qaratik atorsinnaanngitsut

The New York Times-imilu apersuinermi suna pingaarnerpaanersoq Trump aperineqarpoq: Kalaallit Nunaata pigilernissaa Nato-mulluunniit ataannarnissaq.

Tassungalu ima akivoq: "Tamanna aalajangigassanngortariaqarsinnaavoq", USA-llu peqataatinnagu iligiit illersornissaqarnikkut atorsinnaanngitsut nangilluni oqarpoq.

Kalaallit Nunaat kunngeqarfiup Danmarkip ataaniinnermini USA assigalugu illersornissaqarnikkut iligiinnut ilaasortaammat, USA-llu pisortaqarfiata USA-p sakkutooqarnikkut Kalaallit Nunaannut akuliunnissaa itigartitsissutiginngimmassuk, Nato pillugu apeqqut naleqquppoq.

USA-p pisortaqarfiata Kalaallit Nunaanni sakkutooqarnikkut akuliunnissaq periarfissatut isigigaat, sapaatip-akunnerani matumani siusinnerusukkut nalunaarummi oqaatigineqarpoq.

"USA-p sakkutuuinik atuinissaq naalagaanersap periarfissatut isigiuaannaraa", præsidentip illorsua tassani allappoq.

Siusinnerusukkut præsidentip illorsuanit arlaleriarluni erseqqissarneqareersutut, Kalaallit Nunaat Trumpimut "nunap isumannaatsuunissaanut pingaaruteqarnerpaavoq".

USA-p Danmarkillu illersornissaq pillugu isumaqatigiissutaat 1951-imeersoq naapertorlugu - Nato aqqutigalugu - Danmarkip Kalaallit Nunaannik illersuinerani ikiuinissamut USA pisussaaffilerneqarpoq. Isumaqatigiissullu naapertorlugu USA-p sakkutuui Kalaallit Nunaannut tamarmut isersinnaapput.

USA-li Kalaallit Nunaanni sakkutooqarfittaassaguni Danmark akuerseqqaassaaq. USA Kalaallit Nunaanni ataasiinnarmik sakkutooqarfimmik  ullumikkut peqarpoq - Pituffik Space Basemi, siornatigut Thulebasenimik taaneqartartumi.

/ritzau/