Pissutsit USA-mit atuutsitaasut pissutigalugit suliffeqarfiit ilungersunartorsiortut

Sulisitsisut Amerikamiut naalakkersuisuisa Kalaallit Nunaat sammileqqimmassuk pissutsit atuuttut maluginiarpaat.

Danskit angalasartut tikeraarnissaminnut angalanissaminnik pisipallattalersimanerat tusarluarnartuusoq, pisortaanerup Christian Keldsenip oqaatigaa.

- Danskinit pisisartunit Kalaallit Nunaata namminersulivinnissaa Amerikamulluunniit ilanngunnissaa sioqqullugu angalanissaminnut tuaviutsassimasunit tusarfigisaqarpugut.

Taamaakkaluartoq ajornartorsiut nutaaq Amerikamiut 2019-imi 2025-milu sammisaannit allaanerulluinnartoq tusakkani nuannerpallaannginnerusoq, Christian Keldsen oqaluttuarpoq.

Sulisitsisummi danskit ataasiakkaat nunatsinni sulerusukkunnaartut nalaattarpaat.

- Inuit suliffittaaraluarlutik maanga nuuttussanngorlutik, annilaangallutik suliartorumajunnaartut takuagut. Taakku danskiupput, taakku tamaani arlaatigut iliuuseqarfigineqarnissartik ernummatigigamikku.

Taakku qanoq amerlatigaat?

- Ataasiakkaajupput. Imaanngilaq inuit nalunaarsuisuliulluta siarnguttartut. Sumiiffinnili assigiinngitsuni tusagaqarfigaagut. 

Qassiarsummi isumakulunneq

Kalaallit Nunaannut tikeraarnissaminnut qunulersut tikeraarnissaminnik taamaatitsiinnarnerat, Naasunnguaq Karen Lundip Qassiarsummi suliffeqarfimmik Riding Greenlandimik piginnittup oqaluttuaraa.

- Tikeraarnissartik taamaatiinnarlugu uannut oqaatigaat. Isumaqarlunga Qaqortup mittarfiatigut angalanissartik akisugigaat, taamaattumik akia appartikkumallugu neqeroorfigigaluarpakka, taanna oqarpoq.

- Nunatsinni qanoq pisoqarumaarnera ernummatigalugu akivoq. Qanoq pisoqarumaarnera aatsaat paasigunikku tikinniarput, Naasunnguaq Karen Lund Riding Greenlandimeersoq oqarpoq.

Kujataani takornarialerisuni Riding Greenlandimi aasamut takornariarnissamut inissat ukiup taamaalinerani tamarmik inniminnerneqareersimasaraluarput. Ukioq mannali inissat affaat taamaallaat inniminnerneqarnikuupput.

Qaqortumi mittarfittaassap ernumalersitsisimanissaa Naasunguaq Karen Lundip tamanna sioqqullugu nalilereersimavaa, USA-mullu tunngatillugu pissutsit iluaqutaanngivipput.

- Takornariartitsilluta angallassinissatsinnut inissat sinneruttut tuninissaannut ukiup affaa maanna periarfissaraarput. Qaqortumi mittarfimmut tunngatillugu piumasaqaatit nutaat ernumalersitsereerput. Massakkullu pisut aamma. Takornariat tamakku immaqa ernummatigilaarsimassavaat.

Nalinginnaasorujussuusoq

- Nunarsuarmi sumi tamaani pisoqaleraangat takornariat angalanissartik taamaatittarpaat, Christian Keldsen oqarpoq.

- Kinami SARS-imik nappaalasoqartoq paasineqarpat, inuit Thailandimut angalanissartik annilaangagilissavaat. Taamaattumik isumaqarpunga taamaattoqartarnera eqqumiiginanngitsuusoq.

Kalaallit Nunaanni pissutsit qanoq isumannaatsiginerat imaluunniit qanoq ilungersunartiginerat, inunnut nunanit allaneersunut nalileruminaassinnaanera pisortap tassunga tunngatillugu eqqaavaa.

- Inuit nunatta avataaneersut tiguaaniarneq naalagaaffimmullu allamut ilanngussiniaaneq assigiinngitsullu pillugit maannakkut tusagaqartarput. Tamaani apummi angalaarluta ajunngitsugut naluaat.

Pissutsit massakkut atuuttut uniimippata, ajunngitsumik kinguneqarsinnaanera takorloorsinnaaviuk?

- Isumaqarpunga pissutsit maanna atuuttut allaanerulluinnartut. Isumaqarpunga pissutsit pitsaanerulersinniarnissaat ajornakusoortissagipput.