Jørgen Boassenip PET Inatsisartunut qinersinermi allanngorterisimaneraraa
Politiit isertortumik paasiniaasartuisa PET-ip akissutaa ilanngunneqarluni tallimanngornermi nalunaaqutaq 08.12 allaaserisaq nutarterneqarpoq.
Jørgen Boassen ukioq qaangiuttoq pillugu KNR-imit novembarimi oqaloqatigineqarpoq, aamma USA-mut tunngasut pillugit oqaloqatigineqarluni.
Taassuma USA-p nunatsinnik tiguaaniarnissaa ernumassutiginagu taamani oqaatigaa.
Jørgen Boassen isumaqarpoq nunatta assigiinngitsunik oqaatigineqartarnera aamma sakkutuulersorluni pissaaneqarneq ataqatigiissillugit isiginiarneqartartut.
Taassuma apersorneqarnerata kingorna USA-p nunatsinnut soqutiginninnera nunarsuarmi sumiiffimmi assigiinngitsuni eqqartugaaleqqippoq.
Tamanna USA-p Venezuelamik tiguaaneranik aamma præsidentip Trumpip siunnersortaata qaninnerpaap nuliata, Katie Millerip Kalaallit Nunaata assinganik : 'Qanittukkut-mik" oqaasertalimmik saqqummiussineranik pissuteqarpoq.
Taamaammat Jørgen Boassenip Venezuelamik maanna tiguaasoqareernerani Donald Trumpimut aamma nunatsinnik tiguserusunneranik isiginninnera allanngorsimanersoq paasiniarlugu KNR-ip attaveqarfigaa.
- Naamik, uanga ernumanartussaqartinngilara, taanna oqarpoq.
Uippallertoqarani
Jørgen Boassenip Amerikamiut præsidentianut qanittumik attaveqartunit nunarput pillugu saqqummiussisoqarnera tupiginngilaa.
- Tupinnanngilaq, tamakku takkussuuttussaappata tassami Trumpip allattoqarfia qanittuarakasimmik imminnut suleqatigiipput.
Jørgen Boassen Jens-Frederik Nielsenip tusagassiortunik ataasinngornermi katersortitsisoqarnerani oqaaseqarneratulli eqqissisaavoq.
- Uivissanngilagut, sunami ernumassutigissagatsigu? Amerikamiummi toqoraajartorlugit nunatsinnukarnavianngillat.
KNR-ip USA pillugu immikkut ilisimasalik assingusumik aamma oqaloqatigaa, taassumalu nunatsinni sakkutuuliinissaq ilimananngitsoq aamma nalilerpaa.
Amerikamiut nunanut allanut ministeriata Marco Rubio Frankrigimut aamma USA-mi politikerinut sakkutuuliiniarnatik marlunngormat oqaatigaa.
Naallu Jørgen Boassen sakkutuuliinikkut tiguaasoqarnissaa ernumassutiginngikkaluaraa Donald Trump naalakkersuisunut uumisunnissamut pissutissaqarsoraa.
Kina pillugu oqaatsit ajorsitsaarissutaasut
Jørgen Boassenip naalakkersuisut USA-mut akerliusumik iliuuseqarsimanertik pissutigalugu taama maanna inissisimasorai.
Nunanut allanut naalakkersuisup, Vivian Motzfeldtip (S) niuernermut aalisarnermullu tunngatillugu Kinamik suleqateqarneq pitsanngorsarusullugu Kinami naalagaaffiata pigisaanut tusagassiorfimmut Xinhuamut apriilimi oqaatigaa.
Tamatuma kingorna Naaja Nathanielsenip (IA) suleqatini KNR-ikkut illersorpaa. Taassuma nunarput Kinamut aalisakkanik nioqquteqartareersoq nunalu suleqatigilluarneqartoq nassuiaatigaa.
Oqaaseqarnerit taama ittut USA-mut ajorsitsaarissutaaqataasut Jørgen Boassen isumaqarpoq.
- Trumpip soqutigisaanut akerliupput. Taamaammat iliuuserisaat ulorianarluinnarput. Trumpip taama qisuariaateqarnera avaqqunneqarsinnaanngilaq.
Jørgen Boassenillu USA-p nunatsinnik soqutiginninneranik eqqartuinermini Kina uniffiginngilaa.
Eqqartukkaminillu ingerlaqqilluni naalakkersuisut piviusumik pissaaneqaratik Danmarkimit aqunneqartut oqaatigaa.
- EU danskillu ministeriunerat Kalaallit Nunaannik maanna aqutsisuupput. Uagut naalakkersuisorinngikkigut, Jørgen Boassen isumaqarpoq.
- Trump Kalaallit Nunaannut naammagittarsinnaajunnaariartorsoraara, Jens-Frederik Nielsenimi naalakkersuisullu danskit ministeriannit aqunneqarput.
Taama oqaaseqarnera Jørgen Boassenip nammineq isumaanut takussutissiivoq, naalakkersuisummi tamanit qinigaapput; tamannali USA-mik soqutigisaqartup apeqquseraa.
Qinersineq peqquserluuteqartoqarnermi allanngortinneqartoq
Donald Trumpip nammineq USA-mi qinersinermi peqquserluuteqartoqarneranik uppernarsarneqanngitsunik oqaaseqarneranut atatillugu Jørgen Boassenip Inatsisartunut qinersineq peqquserluuteqarnikkut allanngortinneqarsimanersoq apeqquserpaa.
- Qinersinermi matumani taasisut 1.400-t demokraatinut ajugaatitsipput. Taakku danskiupput, nunatsinni qaammatit arfinillit sinnilaarlugit najugaqartut. Taakku arlaat unioqqutitsisumik taasisimanersut naluarpulluunniit.
Danskit innuttaasut nunatsinni qaammatini arfinilinni najugaqareerlutik kalaallit qinersineranni qinersisinnaanerat eqqortuuvoq.
Kisianni qinersinermi peqquserluuteqartoqarsimanersoq uppernarsaatissaqanngilaq.
Taamaakkaluartorli Jørgen Boassenip oqarnini attatiinnarpaa.
Taamaalilluni nuuttut qaammatit arfinillit qaangiutiinnartut qinersisinnaatillugit naalakkersuisut inatsisitigut akuerisaasumik tamanut oqartussaaqataatitsiviusutut akuerinngilai.
- Danskit nunatsinnit aallaqqingajalersut nunatta siunissaannik aalajangeeqataasinnaanerat tamanut oqartussaaqataatitsiviusutut taaneqarsinnaanngilaq, taanna oqarpoq.
PET-ip pasillernera
Kinap oqaluuserineranit qinersinermi peqquserluuteqarnermut sammereerluni USA-mik soqutigisaqartoq allamik aamma eqqartueqqippoq.
Jørgen Boassenimi allamik aamma ilimagisaqarpoq: tassa danskit isertortumik misissueqqissaartartui PET qinersinermut sunniuteqaqataasimatippai.
Pasilliinera tamanna arlaatigut uppernarsaatissaqanngilaq.
- Tusarfiit kinaassutsiminnik isertuussisut PET kalaallit qinersinerannut akuliussimanerarpaat, danskillu naalagaaffiata Demokraatit qinersinermi ajugaatissimavai.
PET-ip kalaallit qinersinerannut sunniuteqarlutik taasinernik eqqunngitsunik ilanngussisimanerannut uppernarsaatissaqanngilaq. Akerliusumik iliuuseqartoqarsimaneranik takorluuineruinnanngila?
- Akerliliisumik iliuuseqartoqarneratut taaneqarsinnaanersoq naluarput. USA-mi sumiiffinnilu allani taama iliuuseqartoqarsinnaappat Kunngeqarfik Danmarkimi nunat akulerunneranni assingusumik allatigulluunniit iliuuseqartoqarsinnaannginnersoq soorunami tupiginavianngilara.
KNR-imut allakkatigut akissummi PET-ip Jørgen Boassenip pasilliinera ilumuunnginnerarpaa.
- Kalaallit Nunaanni Inatsisartunut qinersinermut arlaatigut akuliussimannginnerput PET-ip erseqqissumik oqaatigissavaa.
- Naalagaaffeqatigiinnermi tamarmi kiffaanngissutsimut, tamat oqartussaaneranut isumannaatsuunermullu navianartorsiortitsinerit pinaveersaartinnissaat, misissuiffiginissaat akiornissaallu - tassunga ilanngullugu Kalaallit Nunaanni sunniiniarnerit kilitsissiaqarnerullu akiorneqarnissaat PET-ip suliassarai.
- PET-ip Kalaallit Nunaanni oqartussat qanimut suleqatigalugit ukiuni kingullerni sulinini annertusiartuinnarpaa.
Nammineq partiimik aallartitsissagunartoq
Jørgen Boassen Sermitsiamit qaammatip siuliani apersorneqarpoq.
Tassanilu nammineq partiimik aallartitsinissani isumaliutigalugu oqaatigaa.
Partiimik peqatigiiffimmilluunniit aallartitsiniarnerlutit qaqugu paasinarsarniarpiuk?
- Ulluni sapaatilluunniit akunnerini aggersuni.
