Trumpip Venezuelami inerteqqutaasumik pitoraassinera Kalaallit Nunaannik tiguaaniarnissaanut ajornakusoornerulersitsisoq, immikkut ilisimasalik naliliivoq
Venezuelamiut præsidentiat Nicolás Maduro paarineqartoq, USA-llu nuna tiguaraat, Amerikamiut aqutsisoqarfiannit arfinngormat nalunaarutigineqarpoq.
Præsident Donald Trumpip siunnersortaasa qaninnerit ilaata nulia inoqatinut attaveqaqatigiittarfimmi X-imi Kalaallit Nunaat Amerikamiut erfalasuata qalipaataanik qallersimasoq kinguninngua saqqummiuppaa.
Saqqummiussamini naatsumik allallugu: ‘Erngiinnaq’.
Naak Venezuelamik sakkutuulersorluni tiguaaneq, Donald Trumpip Kalaallit Nunannik tiguaarusunneranut attuumassuteqartumik pisuugaluartoq, Kalaallit Nunaannik sakkutuulersorluni tiguarneqarnissaa piviusorsiortuunngitsoq, Niels Bjerre-Poulsen isumaqarpoq.
Taanna Syddansk Universitetimi Center For Amerikanske Studiemi lektoriuvoq.
- Kalaallit Nunaanni tiguaaniarnissamut inatsisitigut tunngavissaq suussava? Inummik aallarussiniarpat? Taamatut pisoqarsinnaanissaa takorlooruminaatsuusoq oqarusuppunga.
Inerteqqutaasumik tiguaaneq
USA sorsussagaluarpat tiguaassappalluunniit kongressimi politikeriniit akuerineqaqqaartariaqarpoq.
USA saassunneqassagaluarpat, præsidenti kongressi avaqqullugu sakkutuulersussalluni taamaallaat aalajangiisinnaatitaavoq, Niels Bjerre-Poulsen oqaluttuarpoq.
Tassani Kongressimi politikerit ataatsimuunnginnerini aalajangiisinnaannginneriniluunniit pisumi immikkut pineqarpoq.
Venezuelamili taamaattoqanngilaq.
- Venezuelami iliuuserineqartoq pillugu kongressimiit akuersissutigineqaqqaartussaavoq, Niels Bjerre-Poulsen oqaluttuarpoq.
Venezuelami sakkutuuliineq politiinik pitoraassinerusoq, tassa sakkutuulersorluni tiguaanerunngitsoq, Amerikamiut Nunanut allanut ministeriat Marco Rubio tusagassiortunut sassarnermini arfininngormat oqarpoq.
Oqaluttuaq taanna præsident Donald Trumpimit tunngaveerutsinneqapallappoq, tassani USA-p Venezuela maanna aquleraa taamaattumillu naalakkersuinikkut allanngortoqartariaqartoq oqarpoq.
Naak Amerikap nunami naalakkersuinikkut aaqqissuussineranut akerliusumik inerteqqutaasumik tiguaasoqarnera pineqaraluartoq, massakkoqqissaaq kinguneqartinneqarnavianngitsoq, USA pillugu immikkut ilisimasallip nalilerpaa.
Tamanna Donald Trumpip partiiata kongressimi senatimilu massakkut aqutsisuunerannik pissuteqarpoq.
- Nuanngitsortaalu tassani misigaavut, kongressi republikanerinit aqunneqartillugu præsidentip iliuuserisinnaasai amerlineruinnangajapput.
Kalaallit Nunaata tiguarneqarnissaa ilimananngitsoq
Kalaallit Nunaat Natomut ilaasortaavoq. Tamanna Donald Trumpi kongressi avaqqullugu Kalaallit Nunaannik tiguaagaluarpalluunniit – soorlu Venezuelami – USA-mut imaannaanngitsumik kinguneqarsinnaavoq, Niels Bjerre-Poulsen oqaluttuarpoq.
Taamaammat taama pisoqarnissaa ilimananngilluinnartutut taassuma isigaa.
- Taamaattoqassappat tapersersorneqarnavianngilaq, tamannalu kinguneqartorujussuussasoq eqqarsarpunga. Taamaaliortoqassappat ilutigalugu USA NATO-miit ilaasortaajunnaartariaqarpoq imaluunniit ilaasortaajunnaaqqaartariaqarpoq.
Donald Trumpip Venezuelamut akuliunnera, præsidentip partiiani avissaartuutsitsisoq, taassuma maanna oqaluttuarereerpaa.
Taamaalilluni USA-p Kalaallit Nunaannik tiguaanissaanut ingalluni ilimanaateqannginnerulerpoq, Niels Bjerre-Poulsen oqaluttuarpoq.
- Venezuela USA-mut sutigut tamatigut ajoqutaareerpoq. Venezuelap taamatut inisseriataarnera iluatsitsinertulluunniit oqaluttuarineqarsinnaavoq, Trumpip naalakkersuisuisa alliliineruniarnissaannut kajumissaarutaalluni, aammali ajornartorsiuterpassuarnik suliassaqalernissaannik isumaqarpoq.
USA-mi akerliuneq
USA-mi kongressimut senatimullu qinigaaffiup qiterpaarnerani novembarip aallartinnerani qinersisoqarpoq. Demokratit kongressimi amerlanerussuteqassappata januaarimi 2027-mi atuutilersumik, Kalaallit Nunaannik tiguaaniarnissaq suli ilimanaateqannginnerussasoq, Niels Bjerre-Poulsen naliliivoq.
- Demokratit qinigaaffiup qiterpaarnerani qinersinermi amerlanerussuteqassappata tusarniaasoqassaaq, naalakkersuisunut qullersaasunut eqqartuussineqaqqeriaannaanissaa takorloorneqarsinnaavortaaq, taanna oqarpoq.
USA-p isumannaallisaanermut tunngatillugu Kalaallit Nunaat tiguartariaqaraa Donald Trumpip arlaleriarluni oqaatiginikuuaa.
Illersornissamulli isumaqatigiissut tunngavigalugu Amerikamiut Kalaallit Nunaanni sakkutooqarnikkut qanorluunniit iliorsinnaangajapput, taamaattumik kongressi sorliugaluartulluunniit tiguaanissaq akuersissutigissagaa, Niels Bjerre-Poulsenip ilimaginngilaa.
- Kongressip arlaannaataluunniit akuerissagaa takorloorsinnaanngilluinnarpara.
Tiguaaneq pisinnaanngitsoq præsidentip qaninnertut siunnersortaata oqaluttuutereersimagaa erseqqilluinnartoq, tassunga ilanngullugu taassuma oqaatigaa.
- Taarsiullugu præsidentip kalaallit namminersortuunerat tikilluaqquaa. Kalaallit namminiilivippata USA-lu suleqatigiinnermik ammasumik isumaqatigiissusiortoqarnissaa eqqarsaatigisinnaaneraat neriuutigineqarpoq.
- Trumpili oqarmat ‘Arlaatigut pissarsiariumaaripput isumaqarpunga’ siunnersortaa erloqiummeqaaq.
