- Oqalunnerit taamaattut naammaleqaat. 

USA-p præsidentia Donald Trump USA-p Kalaallit Nunaannik pisariaqartitsinera pillugu oqaaseqareersorlu naalakkersuisut siulittaasuat Jens-Frederik Nielsen (D) taama oqarpoq.

Inoqatinut attaveqaatini allatamini Jens-Frederik Nielsen oqaaseqarpoq. Tassani kinguaariippassuarni USA qanigisatut aalajaatsutullu ikinngutigisimagipput eqqaasitsissutigaa.

- Tamanna peqqutigerpiarlugu USA-p nipi atortaqattaagaa akuerineqarsinnaanngilluinnarpoq.

- USA-p præsidentiata maanna oqaaseqaqqinnermini Venezuelap sakkulersorfigineqarnerani taputartuulluta eqqaallatsiarpaatigut ima oqarluni: “Kalaallit Nunaat atorfissaqartipparput”. Tamanna kusananngilluinnarpoq ataqqinninnginnerujussuullunilu, Jens-Frederik Nielsen oqarpoq.

Nunarput pissaanilerngusaannermi atugassaannartut isigineqarsinnaanngilaq

Trumpip Kalaallit Nunaat pillugu oqaaseqaataa tusagassiuutini The Atlantic-imi USA-p Venezuelamik saassussineranut atatillugu apersorneqarnermini siullerpaamik saqqummiunneqarpoq.

- Kalaallit Nunaat pisariaqartilluinnarparput, tusagassiivik The Atlantic naapertorlugu Trump oqarpoq.

Tusarliussaq tamanna ukiup ataatsip ingerlanerani arlaleriarluni oqaatigisarpaa.

Maanna taamatut oqartoqaqqinnerata kingorna - USA-p Venezuelamik arfininngormat saassussinerata aqaguani - Jens-Frederik Nielsen qisuariarpoq.

- Nunarput pissaanilerngusaannermi atugassaannartut isigineqarsinnaanngilaq, minnerunngitsumik ikinngutit qanigisat aalajaatsullu pineqartillugit. 

- Nanertuiniarnerit unitsillik. Ernumasaarinerit unitsillik. Tiguaaniarnernut sinnattuaqinerit unitsillik, taanna oqarpoq.

Eqqartueqatigiinnernut naalakkersuisut ammanerat naalakkersuisut siulittaasuata erseqqissaatigeqqippaa.

- Kisianni tamanna aqqutit eqqortut atorlugit inuiaallu pisinnaatitaaffii ataqqillugit ingerlanneqassaaq.

- Kalaallit Nunaat uagut angerlarsimaffigaarput aammalu killeqarfipput pigaarput. Tamannalu attatiinnarneqassaaq, Jens-Frederik Nielsen oqarpoq.

Sioorasaarutit unitsillik

Trumpip oqaasii pissutigalugit Danmarkimi ministeriuneq Mette Frederiksen aamma inoqatinut attaveqaatitigut qisuariarpoq.

- USA-mut toqqaannartumik oqartariaqarpunga, ministeriuneq oqarpoq.

- USA naalagaaffeqatigiinnermi nunat pingasuusut arlaannik tiguaanissaanut tunngavissaqanngilaq.

- Taamaattumik USA qanimut suleqatigisimasaminut sioorasaariunnaaqqullugu kajumissaarpara. Aamma nunap inuiaallu tuniniarneqannginnermik erseqqissumik oqarsimanerat erseqqissassavara, taanna oqarpoq.

Trumpip nunat siuttui taakkua marluk oqaaserisimasaat tusaanngitsuusaarlugit timmisartumi Air Force One-miitilluni sapaatip unnuaani oqariartuutini uteqqippaa. Tassani Kalaallit Nunaannut tunngatillugu iliuuseqarumaarnissaminik naatsorsuuteqarnersoq tusagassiortumit aperineqarpoq.

- Ullut 20-t qaangiuppata oqaluuseriniartigu, Trumpip ullut taakku 20-t itisilernagit taama oqarpoq.

- Nunatta isumannaatsuunissaanut atatillugu Kalaallit Nunaat pisariaqartipparput. Danmarkip suliassaq tamanna nammineq kivissinnaanngilaa. Taama oqarsinnaavunga, præsidenti oqarpoq.