- Maaniittariaqanngikkaluarpunga. Atuartussagaluarpunga. Uagut inuusuttut neriuuteqarfigaatsigut – qanoq taamaassinnaavisi? Oqaatsissigut imaqanngitsutigut takorluukkakka meeraaneralu tillipparsi, qullililluni oqarpoq.Assi: Lucas Jackson/Reuters/Ritzau Scanpix

Greta Thunberg Naalagaaffiit Peqatigiinniinnermini kamattoq: Meeraanera tillipparsi

Inuusuttuaraq svenskiusoq Naalagaaffiit Peqatigiinni silap pissusia pillugu siuttunik peqataasoqarluni ataatsimiinnerup ammarneqarnerani killitsisimaarluni oqalugiarpoq.

Svenskip silap pissusia pillugu ilungersuuteqartup Greta Thunbergip nunarsuarmi politikerit sakkortuumik appisaluuppai akisussaaffimminnik sumiginnaanerarlugit nunarsuullu kissakkiartornerata akiornissaanik ilaginnaasimanerarlugit.

Naalagaaffiit Peqatigiinni silap pissusia pillugu siuttunik peqataasoqarluni ataatsimiinnerup New Yorkimi ammarneqarnerani killitsisimaarluni oqalugiarnerani tamanna pivoq.

- Maaniittariaqanngikkaluarpunga. Atuartussaagaluarpunga. Uagut inuusuttut neriuuteqarfigaatsigut – qanoq taamaassinnaavisi? Oqaatsissigut imaqanngitsutigut takorluukkakka meeraaneralu tillippasi, qullililluni oqarpoq.

AAMMA ATUARUK Thunberg USA-mut tikereerluni: Trump maanna iliuuseqaqataasariaqarpoq

Inuusuttuaraq svenskiusoq silap pissusia pillugu suliniaqatigiiffimmi amerlaneruleraluttuinnartunit tapersersorneqartumi siuttuuvoq, nunarsuarlu tamakkerlugu illoqarfinni tallimanngormat akerliussutsimik takutitsineq taakku aaqqissuussaraat.

- Sumiginnassalluta toqqassagussiuk qaquguluunniit isumakkeerfiginngisaannassavassi. Isumaqassanngilasi qanoq iliuusersi akuersaarneqassasoq. Silarsuaq eqiilerpoq, piumanngikkaluarussiluunniit allanngortoqalerpoq, Greta Thunberg oqarpoq.

Greta Thunberg Naalagaaffiit Peqatigiit pisortaanerannit António Guterresimit oqalugiartussatut qaaqquneqarpoq. Pisortaanerup nammineq siuttunik peqataasoqarluni ataatsimiinneq ammarlugu oqarpoq nunarsuaq tamakkerlugu silap pissusiata allanngornera tassaasoq ‘ajornartoorfik’.

AAMMA ATUARUK USA-mi inuusuttut Gretha Thunberg akerlioqatigigaat

Silarsuarmi siuttut silap pissusia pillugu pilersaarutiminnik sukaterisitsinissaat siuttut peqataaffigisaannik ataatsimiinnermi siunertarineqarpoq, pilersaarutit massakkut atuuttut nunarsuaq tamakkerlugu silaannaap kissakkiartorneranik kigaallatsitsinissamut naammanngimmata.

- Silap pissusia pillugu siuttut peqataaffigisaannik ataatsimiinneq oqaluinnarfiunngilaq. Oqaluinnarneq naammaleqaaq. Silap pissusia pillugu ataatsimiinneq isumaqatigiinniarfiunngilaq. Pinngortitaq isumaqatigiissuteqarfiginiarneqarsinnanngilaq. Manna tassaavoq silap pissusia pillugu siuttut peqataaffigisaannik ataatsimiinneq qanoq iliuuseqarfissaq, oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat