Thunberg USA-mut tikereerluni: Trump maanna iliuuseqaqataasariaqarpoq

Silap pissusiata allanngoriartorneranik akiuiniaqataasoq, 16-inik ukiulik Greta Thunberg, Sverigemeersoq, Atlantiku ikaarlugu ulluni 15-ini angalareerluni New Yorkimut maanna tikippoq.
Greta Thunbergip imaatigut angalanini ilimagisamisut nuanniissimanngitsoq oqaatigaa. Ullunilu 15-ini imaatigut angalanermini merianngusimanngilaq. Assi © : Scanpix
Allattoq Ritzau
aggustip 29-at 2019 09:49

Thunberg Tuluit Nunaanni illoqarfimmit Plymouthimit saapatip-akunneri marluk matuma siornatigut avalappoq.

Naalagaaffiit Peqatigiit silap pissusia pillugu ataatsimeersuarnissaannut Greta Thunberg peqataajartorpoq.

Silap pissusiata allanngoriartornerata iliuuseqarfigineqartariaqarnera, Thunbergip tikeqqammerluni præsident Donald Trumpimut kaammattuutigaa:

- Immikkut ilisimasallit tusaaniartariaqarpai, takusinnaavarami tusaanianngikkai, Greta Thunberg oqartoq, nutaarsiassaqartitsiviup AFP-p allaaseraa.

Thunberg, New Yorkimut tikeraarnermi saniatigut Canadamut Mexicomullu angalassaaq, silallu pissusiata allanngoriartornerata akiorniarneqarnissaa pillugu Chilemi isumaqatiginninniarnernut ukioq manna decembarimi aamma peqataassalluni.

Amerika Avannarlermi Kujallermullu angalaneq qimuttuitsut bussillu aqqutigalugit naammassineqassaaq.

16-inik ukiulik Sverigemeersoq, politikerinut siuttunullu allanut nunanit tamalaaneersunut oqalugiarnikuuvoq. Nobelip eqqissinermut nersornaasiuttagaanut innersuunneqarsimavoq, inuillu sunniuteqarluarsinnaanerpaat ilaannut atuagassiamit Time Magazinemit toqqarneqareerluni.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk