Ataatsimiititaliap siulittaasuata Danmarkimi tusarliuteqqusaanngitsut pillugit ataatsimiinnermut mattunneqarneq pakatsissutigigaa
Inatsisartunut ilaasortat innuttaasutut pitsaanerunngitsutut iliuuseqarfigineqarput. Inatsisartuni Nunanut allanut Sillimaniarnermullu Ataatsimiititaliami siulittaasoq, Pipaluk Lynge (IA) Folketingimi Nunanut allanut tunngasunut aalajangiisartut tusarliuteqqusaanngitsut pillugit marlunngornermi unnukkut ataatsimiinnerisa kingorna oqaatsinik taama sakkortutigisunik atuivoq.
Ataatsimiinnermi qulequtarineqartoq ataasiuvoq: Kunngeqarfiup USA-mut atassuteqarnera.
Nunatta nunani tamalaani pissutini qitiuleqqinnera pillugu ataatsimiinnermi nunanut allanut ministeri aamma illersornissamut ministeri peqataapput. Amerikamiut præsidentiata Donald Trumpip Kalaallit Nunaat amerikamiunit pigineqartariaqartoq ataasinngornermut unnuami uteqqippaa.
Taamaammat Pipaluk Lyngep Inatsisartuni Nunanut allanut Sillimaniarnermullu Ataatsimiititaliami ilaasortat ataatsimiinnissamut qaaqquneqannginnerat isornarluinnartuunerarpaa.
- Folketingip Nunanut allanut tunngatillugu Aalajangiisartui peqataatinnata immikkut ittumik ataatsimiipput. Tamanna akuersaarsinnaanngilara.
- Sooq matut silataanni utaqqissaagut. Sooq pissutsit folketingimi ilaasortanut ilisimatinneqareernissaannut utaqqissaagut? Tamanna pisoqarnermi uagut qitiunitsinni ajornartorsiutaalluinnarpoq, taamaakkaluartorli paasissutissarsinissamut utaqqissaagut, taanna oqarpoq.
Pipaluk Lyngep oqarnera naapertorlugu pakatsinartoq taanna ukiut arlallit ingerlanerani pakatsinarneruleraluttuinnarpoq.
- Christiansborgimit paasinnittoqarnissaanut piumasaqaateqaqqaartariaqarpugut. Naak piffissami matumaniikkaluarluta piumasaqaateqangaatsiaqqaartariaqarpugut.
- Innuttaasutut pingaannginnerusutut iliuuseqarfigineqarnerput nunasiaateqarnermi periaaseqarneruvoq, taanna oqarpoq.
Naalagaaffeqatigiinneq qanoq atorniarpisiuk?
Christiansborgimi inimi isumannaatsumi tusarliuteqqusaanngitsut pillugit marlunngornermi ataatsimiittoqarpoq, ilaasortat ataatsimiinnermut oqarasuaateqaqqusaanngillat, imaluunniit kaffinnguamilluunniit nassarsinnaatitaanngillat.
Pipaluk Lyngep oqarnera naapertorlugu ukiuni arlalinni – qinigaaffimmi matumani aamma siuliani – Inatsisartut folketingimilu ilaasortat piffissami ataatsikkut paasissutissiissuteqarfigineqartarnissaat piumasaqaatigisarpaa.
Taamaakkaluartorli tamanna allanngorsimanngitsoq misigisimavoq.
- Isertuussisussaatitaanermik piumasaqaat sukannersoq atsiornikuuarput. Inimik isumannaatsumik peqarpugut, Teamsikkut peqataasinnaavugut. Soqanngilarli.
Pakatsinartoq
IA-mit politikerip tamatuma saniatigut Itillimi isumaqatigiissummi allassimasutulli tamanna nunatta nunatsinnut tunngasuni peqataatinneqarnissaa sunniuteqaqataanissaalu pillugit isumaqatigiissummut tamanna naapertuinngilaq.
Malittarisassat ullumikkut atuuttut malillugit danskit naalakkersuisui Folketingimi Nunanut allanut aalajangiisartunut paasissutissiisarlutillu siunnersuisarput, nunatsinnilu naalakkersuisut Nunanut allanut sillimaniarnermullu ataatsimiititaliamut paasissutissiisarlutik.
Nuummi pissutsit taamaanneranni ataqatigiinngitsoqartoq, taanna isumaqarpoq.
- Nunanut allanut ministerierput aqqaniliinnarnik sulisoqartoq aamma ulloq unnuarlu sulisareersoq killeqartorujussuuvoq, taanna oqarpoq.
Taamaammat Inatsisartuni politikerit folketingimi politikeritulli paasissutissarsinissaminnut utaqqisassannginnissaat piumasaqaatigaa.
- Paasissutissat assingi piumavagut, Trumpilu siorasaaruteqaraluartorluunniit pissarsiarineq ajorpagut. Tamanna pakatsinarluinnarpoq.
- Danmarkip naak isumaqatigiissuteqaraluartorluunniit peqataatinnianngikkunisigut sooq naalagaaffeqatigiikkusunnersut apeqqutigerusunnarpoq. Naligiinnginnitsinni naalagaaffeqatigiinneeqatigiinnissaq uagutsinnut kajuminnanngilaq, Pipaluk Lynge oqarpoq.
Allannguinissanik aallartitsisoq
Christiansborgimi Nunanut allanut tunngasunut aalajangiisartoqartigiit siulittaasuata, Christian Friis Bachip Venstremeersup tusarliuteqqusaanngitsunik marlunngornermi ataatsimiinneq danskit naalakkersuisuinit folketingimi ilaasortanut paasissutissiinernik ilaqartoq erseqqissaatigaa.
Taamaakkaluartorli Pipaluk Lyngep pakatsinera paasisinnaalluarpaa.
Taamaammat allannguinissanik assigiinngitsumik pingasunngornermi aallartitsivoq. Taassuma Nunanut allanut ministereqarfik ilaatigut saaffigaa, tassanilu aalajangiisartuni ilaasortanut paasissutissat nuummi ataatsimiititaliami politikerinut aamma ilatinneqartarnissaat kaammattuutigaa.
- Ataatsimiinnerit ataatsikkut ingerlanneqartarnissaat aamma naalakkersuisut Inatsisartullu ataatsimeeqatigineri danskit naalakkersuisuisa aanna Nunanut allanut aalajangiisartut akornanni ataatsimiittarnertulli pinissaat pingaaruteqarsorigiga erseqqissaatigaara, taanna oqarpoq.
Attaveqaammik isumannaatsumik pilersitsinissaq kaammattuutigigaa
Inatsisartuni ilaasortat Kalaallit Nunaannut tunngasunik ataatsimiinnermut peqataasinnaannginnerannut suna aporfiua?
- Nunanut allanut tunngasunut aalajangiisartuni kikkut aalajangiisartuniinnerannut ersarilluinnartumik inatsiseqarpoq. Marlunngornermi ataatsimiinnermisulli sinniisunilluunniit peqataasoqarsinnaanngilaq. Taamaammat inatsimmi tassani kikkut ilaanissaat aalajangersimaqqissaarpoq.
- Ataatsimiinnerit isertuussassaalluinnarput, tassanilu inimi najuunnissarput piumasaqaataalluni, taanna oqarpoq.
Venstremit qinikkap marlunngornermi ataatsimiinnerup kingorna Folketingimi siulittaasoq allaffigisimallugu oqaatigaa, taannalu Folketingip Inatsisartullu akornanni isumannaatsumik attaviliisoqarnissaanik kaammattuuteqarfigaa.
Pipaluk Lynge Inatsisartuni ilaasortat paasissutissat assinginik paasissutissarsisinnaannginnertik pissutigalugu innuttaasutut pingaannginnerusutut iliuuseqarfigineqartut misigisimavoq. Isornartorsiuineq tamanna qanoq isumaqarfigaajuk?
- Taama pakatsinera ajuusaarutigaara. Kisianni Nunanut allanut Sillimaniarnermullu Ataatsimiititaliap Kalaallit Nunaanniit danskit naalakkersuisuinut paasissutissiinissamut peqataatinneqarnissaat piviusumik ataqqinninnginnerussaaq.
- Kisianni pakatsinera paasisinnaavara, taanna oqarpoq.
