Amerikamiut præsidentiata USA-p Kalaallit Nunaat nunap sillimaniarneranut pisariaqartikkaa oqaatigeqqereeraalu nunatsinni partiimi siulittaasut KNR-imi immikkut ittumik ataasinngornermi unnukkut oqallipput.

USA-p Venezuelamut saassussineranit ulloq ataaseq qaangiuttoq tassa ataasinngornermi tamanna oqaatigaa.

Tamatuma saniatigut Kalaallit Nunaat Amerikamiut erfalasuannik qalipaasersimasoq inoqutinut attaveqaatikkut X-ikkut saqqummiunneqarnera uissuummissutigineqartoq ukkatarineqangaatsialerpoq. Taanna republikanerit politikianni siuttuusimasut ilaannit, Katie Millerimit Trumpillu siunnersortaanut, Stephen Millerimut katisimasumit saqqummiunneqarpoq.

Millerip saqqummiussaa 31 millioninit amerlanerusunit maannamut  takuneqarsimavoq.

Naalakkersuisut siulittaasuat, Jens-Frederik Nielsen (D) pissutsit pillugit  tusagassiortunik ataasinngornermi ualikkut katersortitsivoq. Taassuma pissutsit KNR-imit oqallitsitsinermi oqaaseqarfigineruai, tassanilu iligisat suleqatigalugit tulliuttumik alloriarnissat piareersarneqaleruttortut oqaatigaa.

- Suleqativut iligisagullu suleqatigalugit iliuuseqarniarneq ingerlatileruttorparput, Demokraatit siulittaasuat oqarpoq, taassumalu alloriarnissap tullia qanoq ilaqarnersoq itisilinngilaa.

Tamatuma saniatigut oqallittarfiit pioreersut, Joint Committee aamma Permanent Committee aqqutigalugit USA-mik oqaloqatiginnittoqassasoq oqaatigaa.

Trumpilli qanorpiaq kissaateqarnera paasiuminaassinnaavoq.

- Trumpip suleqatai allatut oqaluttutTrump allaqqinnaamik  aqaguani  oqaaseqarsinnaavoq, Jens-Frederik Nielsen oqarpoq.

Nato ilanngutitinneqassasoq

Siumup siulittaasua, Aleqa Hammond aalajangiisinnaaguni Natop akuliunnerunissaa piffissanngorpoq.

- Nunarsuarmi politikerneruvoq – Natomi ilaasortat akuliuttariaqalerput. Pissutsit nunarsuarmi politikimut killippoq. Danmark kisiat isumalluutigiinnarsinnaajunnaarparput. Nato akuliuttariaqarpoq, taanna oqarpoq.

Siumup siulittaasuata, Aleqa Hammondip oqarnera naapertorlugu Nato akuliuttariaqalerpoq. Assi © : KNR

Nato allattaanerata Mark Ruttep “Kalaallit Nunaat USA-mut ilanngutissanersoq pillugu” oqallinnermut Natomik akuliutsitserusunnginnini siorna marsimi oqaatigimmagu tamanna politikerinit arlalinnit isornartorsiorneqangaatsiarpoq. Tamanna Trumpip Kalaallit Nunaannik aqutsilernissamik kissaateqarnerminik Præsidentip Illorsuani uteqqiinerani pivoq.

Natop pissutsit qanoq isumaqarfiginerai DR-ip Ruttemut marlunngornermi akissuteqarfiginiartippaa. Tassungali taarsiullugu tusagassiorfik sulisumit atilerneqanngitsumik akissuteqarfigineqarpoq, tassanilu ima allassimalluni:

- Issittoq tamatta sillimaniarnitsinnut pingaaruteqarpoq, Natollu sillimaniarneq, atajaanneq suleqatigiinnerlu ersarissumik soqutigisarai. Issittumi naalagaaffinnit arfineq-pingasunit arfineq-marluk Natomut ilaapput, ataatsimullu iligisat tamarmik illersorneqarnissaat qulakkiissavarput, DR-imut akissummi allassimavoq.

Inuit Ataqatigiit siulittaasuata, Múte B. Egedep Natop akuliunnissaa aamma kissaatigaa.

- Natomi iligut suleqatigisariaqarpagut. Socialmediatigut saqqummertaqattaarunnaarluta  iligut suleqatigalugit maanna iliuuseqartariaqalerpugut. Aleqa Hammond tassani isumaqatigilluinnarpara, IA-p siulittaasua oqarpoq.

Isumassarsiatsialak

Naleqqamit Jens Napaattooq partiimi siulittaasoq Pele Broberg peqataasinnaanngitsoq sinnerlugu peqataavoq. Napaattuup oqarnera naapertorlugu nunatta killeqarfiini sinerissami alapernaarsuinissaq pisariaqarpoq. Tamatumali saniatigut Issittup sakkutuulersorfiunnginnissaata ersarissumik nalunaarutigineqartariaqarnerarpaa.

Tamatumali saniatigut USA-mut saaffiginnittoqartariaqartoq, taanna isumaqarpoq.

- Mette Frederiksen USA-mut saaffiginneqquinnarsinnaanngilarput. Uagut kalaallit qanoq misigissuseqartugut naluaat.Qanoq isumaqartugut naluaat. Amerikamut aperisariaqarpugut sunaana pisariaqartikkissi. Amerikamut saaffiginninniarit. Qanoq ineriartorteqqissinnaavarput suleqatigiinnerput. Inatsisartut inuiaqatigiillu ilanngullugit saaffiginninniarta, Jens Napãtôk’ oqarpoq.

Atassutip siulittaasuata, Aqqalu Jeremiassenip Trumpip ataatsimeeqatigineqarnissaa kissaatigaa. Jeremiassenip oqarnera naapertorlugu Trump ataatsimik anguniagaqarpoq: Kalaallit Nunaata aqulernissaa.

Taamaattumik ataatsimiinnermi taamaattumi akunnermiliuttoqarnissaa taassuma isumassarsiatsialaasoraa.

- Isumaqarpunga tulluartuunngitsoq USA-mut ornillugu Trumpip oqaloqatigineqarnissaa. Akunnermiliuttoqartariaqarpoq. Reykjavikimi ataatsimeeqatigiumaneqarsinnaavoq. Kisianni (Trump aaqq.) qularaara allanut naalaarumanissaa, taanna oqarpoq.

Siumut nunanut allanut naalakkersuisoqarfimmiittuuteqartup oqarnera naapertorlugu nunani tamalaani inuiaqatigiinnut saaffiginninnissamut piffissanngorpoq. Aleqa Hammondip oqarnera naapertorlugu nunat tamalaat akornanni ilungersoraluarluta ilungersuaneq periarfissanik nutaanik aamma ammaassivoq.

- Danskit Amerikamiullu aporaannissaarsuanni periarfissinneqarpugut. Nammineq uagut saaffiginnissinnaavugut. Inuiannguit ikittunnguugaluartugut suunngitsittutut isigissanngilaatigut. Nipi kusananngitsoq ilorraap tungaanut saatsissinnaavarput. Illersornissamut isumaqatigiissut iluaagineqarpat illersornissamut isumaqatigiissut nutarterli, Siumut siulittaasua oqarpoq.