Jens-Frederik Nielsen: Kalaallit Nunaat tunniutiinnanngilaq
Kalaallit Nunaat Danmarkilu USA-mik illersornissamut isumaqatigiissummik atsioreerlutik New Yorkimi tusagassiortunik katersortitsipput.
Tassani Naalakkersuisut siulittaasuat, Jens-Frederik Nielsen (D), danskillu ministeriunerat, Mette Frederiksen, isumaqatigiissummut oqaasertaliipput.
- Kiisami eqqissisinnaanngorpugut, Jens-Frederik Nielsen oqarpoq.
Isumaqatigiissut atsiorneqaqqammersoq Inatsisartunit erngertumik oqallisigineqassasoq, Naalakkersuisut siulittaasuata aamma paasissutissiissutigaa.
Isumaqatigiissut nuannaarutigigaluarlugu USA-mik tatiginnileqqinnissaq sivisusinnaasoq, Jens-Frederik Nielsen oqarpoq.
- USA piffissap ingerlanerani qanimut suleqatigaarput, kisianni maanna nunatsinni innuttaasut akornanni tatiginninneq pilerseqqissavarput, tamannalu sivisusinnaavoq, Jens-Frederik Nielsen oqarpoq.
Toqqissisimavit?
- Toqqissisimavunga, isumaqatigiissuteqarpugut tamatta nuannarisatsinnik isumaqatigiissusiornitsinnilu titarnerit aappaluttut ataqqineqarput, Jens-Frederik Nielsen oqarpoq.
Isumaqatigiissutaareersunik toqqammaveqartoq
Maanna isumaqatigiissutigineqartup ilaata 1951-imit isumaqatigiissutimut assingunera Mette Frederiksenip pingaartippaa.
Amerikamiut nunatsinniissinnaareernerat oqaatigaa, taavalu sakkutooqarfiusussatut taaneqartut nutaat marluk Narsarsuaq Mestersvigilu nutaatut erseqqissaatigai.
Tamatuma saniatigut, USA nunatsinni inuiaqatigiinnik ataqqinninnissaminik pisussaaffilertoq, Mette Frederiksen oqarpoq.
- EU-mi Natomilu suleqatitta Kalaallit Nunaanni aningaasaliisinnaanerata erseqqissaatigineqarnera nuannaarutigaara, Mette Frederiksen oqarpoq.
Isumaqatigiissut atuukkunnaarnissamut ulluliussaqanngitsoq, taassuma erseqqissaatigaa.
Kalaallit Nunaat tunniutiinnanngilaq
USA-mit sioorasaarisoqarnera arlaatigut tunniutiinnartitsisimanersoq, Jens-Frederik Nielsen aperineqarpoq.
- Kalaallit Nunaat tunniutiinnanngisaannarnikuuvoq. Kalaallit Nunaat kalaallit pigaat. Inimi immitsinnut toqqarluta killiliussagullu erseqqaritsillugit oqaloqatigiittarpugut.
- Iluarisannik maannakkut isumaqatigiissuteqarpugut. Siumut maanna ingerlariaqqissinnaanngortugut iligisatsinnut uatsinnullu pingaaruteqartumik takutitsineruvoq.
