Pipaluk Lynge Nunanut Allanut Sillimaniarnermullu Ataatsimiititaliami siulittaasuunerminit tunuartoq

Nalunaaqutaq 16.45 Pele Brobergip siulittaasup tullianit Juno Berthelseniit (N) aamma taarserneqarnera pillugu paasissutissanik nutarterneqarpoq.

Pipaluk Lynge (IA) Nunanut Allanut Sillimaniarnermullu Ataatsimiititalimi siulittaasuunerminit tunuarpoq. 

Tamanna Facebookikkut allappoq. 

- Suliaq Trumpimut USA-mullu tunngasoq naammassingajalerpoq. Ataatsimiititaliamit siulittaasuujunnaassallunga aalajangerpunga. Pisinnaasara tamaat sulisimavunga. Napparsimasinnaatitaananga nukappiaraatikkalu. 

Inatsisartunut 2021-mi qinersisoqareersoq siulittaasunngorpoq. 

- Siulittaasuuffiit inunnit pigineqarneq ajorput kisiannili aallaqqaataaniilli sulisimavunga. Naalakkersuisut siulittaasui marluk nunanullu allanut ministerit marluk sulineranni. 

- Siulittaasunngortussap takorloorsinnaasatsinnit angusaqangaarnerunissaa qularutiginngilara. 

Ataatsimiititaliami kina siulittaasunngussanersoq suli saqqummiunneqanngilaq.

Juno Berthelsenip (N) Naleqqap ataatsimiititaliani atuuffiini taarsiisoqartoq Facebookimi quppernermini aamma allappaa. Pele Broberg siulittaasumut tullersortaajunnaarluni Juno Berthelsen siulittaasumut tullersortaalerpoq.

Nunat tamalaat akornanni ataatsimiinnerit

Pipaluk Lyngep nunat tamalaat akornanni ataatsimiinnerit peqataaffigisimasani allatamini pingaartippai.

- Nunarput pineqartillugu Danmarkilu ataatsikkut ilisimatinneqartalernissarput anguara, Savalimmiut aaqqiissummut uunga, uagut pisinnaatitaaffeqarfigisatsinnut ilanngutsippara.
Kunngeqarfik ataatsimut paasissutissinneqartassaaq, Danmarkiinnaanngitsoq. 

- Kalaallit Nunaat sinnerlugu oqaaseqarsinnaatitaaneq atorluarpara tuniniagaannginnerpullu oqaatigeqattaarlugu; namminiilivinnissarput tamaviaarutigisimagipput; kalaaliorusunnerput.

Oqaloqatigiinnermut peqataagit

Inatsisartunut ilaasortat naalakkersuisullu nunanut allanut angalasarnerisa amerlassusaat tusagassiuutini malinnaaffigineqangaatsiarnikuupput. 

Pipaluk Lyngep angalasarnini tunngavissaqarluarnerarpai.

- Issittup oqaluuserineqarnerani najuuttassaagut. Nunanut Allanut Sillimaniarnermullu Ataatsimiititaliami siulittaasoq attuumassuteqartumik oqalliffiusuni peqataasassaaq. Taamaammat angalanerit amerlanerusut, oqalliffiusut amerlanerusut, ataatsimiinnerit amerlanerusut aamma ataatsimiinnerup nalaani.

Taassuma allakkani qujassuteqarnermik naggaserpaa.

- Naatsorsuutigineqarsinnaajuaannarpunga. Tamanna tulluusimaarutigaara. Tapersersuinermut ataatsimoornermullu qujanaq.