Pipaluk Lynge piumasaqarpoq: USA-p Danmarki ataatsimeeqatigilerpagu nunarput peqataassaaq

Inatsisartuni Nunanut Allanut Sillimaniarnermullu Ataatsimiititaliaq Danmarkimukalerpoq.

Tamanna Pipaluk Lyngemiit (IA) ataatsimiititaliami siulittaasup uppernarsarpaa.

Amerikap senatoriisa Folketingimi Nunanut allanut tunngatillugu Aalajangiisartut  Danmarkimut ataatsimeeqatigiartorlugit aallalermata qisuariarneq pivoq.

Aaja Chemnitzip Alaskami senatori republikanerineersoq Lisa Murkowski oqaloqatigereernerani, ataatsimiinnissaq piviusunngortoq.

Kalaallit ataatsimiititaliaat ataatsimiinnermi peqataanissaa nammineq piumasarisimallugu, Pipaluk Lynge oqaluttuarpoq. 

- Piumasaqaatigaarput. UPN-ip (Nunanut allanut tunngatillugu Aalajangiisartut aaqq.) ilumut peqataassanersugut oqallisigisimagaat ilisimavarput.

- Piumasaraara: Uagut peqataatinnata pilluta oqaloqatigiittoqassanngilaq.

Ataatsimeeqataanissarsi aalajangerneqareerpa imaluunniit piumasariinnarpiuk?

- Piumasaqaannarpunga suliassallu aallartillugit. Akuerineqarnersunga apeqqutaanngilaq.

Danmarki Kalaallit Nunaat sinnerlugu

Amerikami politikerit Kalaallit Nunaat sinnerlugu Danmarkip ataatsimeeqatigissappagu tupigalugu, Ataatsimiititaliami siulittaasup oqaatigaa.

- Senatorit Danmarkimut Nunatsinnuunngitsoq aggersarneqarnerat tupinnartuusoq isumaqarpunga. Taamaattuminguna Inatsisartuniit isummavut oqaatigisinnaaniassagatsigit, ataatsimiinnermi peqataanissarput piumasarigipput.

Taanna tupigusulluni oqaaseqartuni kisimiinngilaq.

Doris Jacobsen Jensen Facebookimi ataasinngornermi assinganik allappoq. 

- Taamaattoq nuannaajallannarpoq Senatorit amerlanerpaartai Danmarkimukaalersut tusarlugu, unali uggoriinnarpara Senatorerpassuit nunatsinnukalinngimmata. Danmarkimut qaaqqunagit nunatsinnut qaaqquneqarsimassagaluaramik, takussagaluarpaat nuna manna qanoq eqqissisimatigisoq aamma nunami maani qanoq inuusugut.

Kiisami oqaloqatigiittoqalertoq

Naalakkersuisut Amerikamiut nunanut allanut tunngasunut ministeriat Marco Rubio ukioq 2025-mili ataatsimeeqatiginiartaraluarlugu, Vivian Motzfeldtip (S) oqaatigereerpaa.

Ajoraluartumik iluatsinngitsumik.

Assingusumik Pipaluk Lynge oqaluttuarpoq, siornatigut oqaloqatiginiarneqartarsimagaluartoq.

- USA-mik 2025 tamakkerlugu oqaloqatiginninniartaraluarpugut. Tamanna kiisami, akornatsinni naapeqatigiinniarsaralutalu paaseqatigiissinnaanissarput periarfissanngorpoq.