TV 2: Løkkep Motzfeldtillu Rubio Washington D.C-mi pingasunngorpat ataatsimeeqatigissagaat
Nunanut allanut ministeri Lars Løkke Rasmussenip (M) aamma Kalaallit Nunaanni nunanut allanut tunngasunut naalakkersuisoq, Vivian Motzfeldtip, USA-p nunanut allanut ministeriat Marco Rubio Washington D.C.-mi pingasunngornermi ataatsimeeqatigissagaat, TV 2 nittartakkamini ataasinngornermi allappoq.
TV 2-p ullorsiutit USA-mi nunanut allanut tunngasunut ministereqarfimmeersut takusimagai, tusagassiuut allappoq. Pilersaarutit allanngortinneqarsinnaanersut tassani aamma allaqqavoq.
Ataatsimiittoqarnissaa pillugu USA-p nunanut allanut tunngasunut ministereqarfiata nittartagaani allaqqasoqanngilaq.
Ritzau nunanut allanut ministereqarfimmut attaveqarpoq, taakkuali TV 2-p paasissutissaatai uppernarsarumanagillu ilumuunnginneranngilaat.
Trumpimut atorfilittaasa sinniisuisa Danmarkillu ataatsimiinnissaat pingasunngornermi pissasoq, USA-mi tusagassiorfiup CBS Newsip diplomatit kinaassusersineqanngitsut issuarlugit, Danmarkip nalunaaqutaa malillugu ataasinngornerup unnuaani, saqqummiuppaa.
Ataatsimiinnerup sumi pinissaa tassani allaqanngilaq. Kikkut sinniissuussanersut sukumiinerusumik aamma allaqqanngilaq.
Danmarkimut angalasoq
Ministeriunerup Mette Frederiksenip (S) partiit siuttui oqallisigeqartigitillugit, nunanut allanut tunngasunut ministerit sapaatip-akunnerata matumani ataatsimeeqatigiinnissaat sapaammi uppernarsarpaa.
USA-p præsidentiata Donald Trumpip nunap isumannaatsuunissaa eqqarsaatigalugu Kalaallit Nunaata “pinissaanik” kissaateqarnera pissutaalluni ataatsimeersuartoqarpoq.
Tamanna nunani tamalaani akornanni politikikkut pissanganartorsiortitsilerpoq.
Danmarkip Donald Trumpip pilersaarutaanit tunuartinniarlugu nunanit Nato-mi ilaasortaasunit, soorlu Tuluit Nunaannit, Tysklandimit, Frankrigimit, Spaniamit, Italiamit Polenimillu tapersersorneqarpoq.
USA-mi senatorit arlallit, Folketingimi nunanut allanut tunngasunut ataatsimiititaliamit Kalaallit Nunaannullu ataatsimiititaliamit aallartitat ataatsimeeqatiginiarlugit Danmarkiliarlutik sapaatip akunnera matumani angalassapput.
Ataatsimiititaliami siulittaasoq Christian Friis Bach (V) senatorinit attaveqarfigineqarpoq, taassumalu tamanna TV 2-mut uppernarsarpaa.
Sapaatip-akunnerata qanoq ilinerani tikeraartoqassanersoq oqaatigineqanngilaq, TV 2-li naapertorlugu tallimanngornermi tikeraartoqassaaq.
/ritzau/
