Plastic Not So Fantastic nersornaasigassatut innersuunneqartoq
Nunat avannarliit 2019-imi Avatangiisinut nersornaasiuttagaannut nunatsinneersoq suliniut "Plastic Not So Fantastic" nersornaasigassatut innersuunneqarpoq.
![Giiti Titussen er en af initiativtagerne bag Plastic Not So Fantastic Giiti Titussen er en af initiativtagerne bag Plastic Not So Fantastic](/sites/default/files/styles/image_934x467/public/article_images/plastic_not_so_fantastic_edited.jpg?itok=LQc96nOh)
Suliniummi - Plastic Not So Fantasticimi suleqataasoq, Giiti Titussen.
Allattoq Jens Betak, Bikki P. Kleist
Nunatsinni avatangiisit plastikkinik mingutsinneqarnerat plastikkimillu atuinerup annikillisarneqarnissaanut suliniuteqartut innersuunneqarput.
Suliniut Facebookimi ukiormanna januaarip aappaanni pilersinneqartoq massakkut 3.882-nik ilaasoqartarpoq.
Taamaattoq nunatsinnit innersuunneqartut allanit unammillertissaqarput - ilaatigut silap allanngoriartorneranik isummaminik nittarsaassisartoq, svenskeq Greta Thunberg innersuunneqarpoq.
Nunat avannarliit 2019-imi Avatangiisinut nersornaasiuttagaanut ajugaasut oktobarip ulluisa 29-anni toqqarneqassapput - 350.000 koruuninillu aningaasartaqarluni.
Attumi pinngortitami isumalluutit pillugit siunnersuisut, Nunat avannarliit 2018-imi Avatangiisinut nersornaasiuttagaannik siorna nersornaaserneqarput.