Corona, corona naatsiiallu asiusut: knr.gl-imi ukioq manna atuarneqarnerpaat qulit aajuku
Corona, corona, corona.
Knr.gl-imi ukioq manna atuarnerpaasasi amerlanerpaartaat coronamut tunngapput, taakkunanngalu marluinnaat coronamut tunnganatik.
Taamaammat asasavut atuartartuvut: Ukiumut qaangiutilersumut ulapaarfiusumullu qujanaq.
Ukiumi qaangiutilersumi nutaarsiassani atuarneqarnerpaat qulit allattorsimaffiat pisarnertut matumuuna saqqummiupparput.
10. Angerlarsimaffimmi mattussaaqqaneq? Ima iliussaatit
Nutaarsiassaq taanna coronamik nunatsinni perngaammik tunillatsissimasoqarneraniit ullut marluk qaangiutereersullu saqqummiupparput.
Taamanikkumiit maannamut tassa qaammatit kingulliit qulit missaat ingerlanerini pisoqalaavippoq. Nunatsinnut tikittut tamarmik tikinnerminniit misissorteqqinnginnerminni ulluni tallimani angerlarsimaannaqqusaarrapput. Coronavirusimik tunillanneqarsimanngitsut misissorteqqinneranni aatsaat ersereeraangat angerlarsimaannaqqusaajunnaartarput.
AAMMA ATUARUK Angerlarsimaffimmi mattussaaqqaneq? Ima iliussaatit
Angerlarsimaannaqqusaanermili pisariaqavissoraangat niuerniartoqarsinnaasoq, nakorsaaneqarfiup nittartartagaani nun.gl-imi allaqqavoq. Pinngitsooranili qanermut assiaquteqarnissaq piumasaqaataavoq.
Misissorteqqikkiartornermilu qanermut assiaquteqarnissaq aamma piumasaqaataavoq.
Nutaarsiassaq una 16.000-riarluni toorlugu iserfigineqarsimavoq.
9. 89-it misissorneqartut: Tunillatsissimasunik nutaanik nassaartoqanngilaq
Inuit coronamut misissortittut amerlassusaat coronap upernaaq tuniluutileruttornerani ullut tamaasa nutaarsiassiissutigisarpavut. Coronali sorpassuit assigalugit ulluinnarsiutaalermat tamaaliussaarpugut.
AAMMA ATUARUK 89-it misissorneqartut: Tunillatsissimasunik nutaanik nassaartoqanngilaq
Nutaarsiassaq una atuarneqarnerpaat qulit ilagaat, taannalu 17.000-riarluni toorlugu iserfigineqarsimavoq.
8. Coronavirusimik tunillatsissimasumik Aasianni nassaartoqartoq
Nutaarsiassaq una maajimi saqqummiussarput nunatsinnut uterluni tikittup coronamut misissorteqqinnerani tunillanneqarsimasutut paasineqartumut tunngavoq.
AAMMA ATUARUK Coronavirusimik tunillatsissimasumik Aasianni nassaartoqartoq
2020-mi taama pisoqaqqillattaarpoq. Nutaarsiassarmi taanna maajip ulluisa 25-anni saqqummeraluartoq suli taama pisoqallattaartarpoq.
Nutaarsiassaq una 17.300-riarluni toorlugu iserfigineqarsimavoq.
7. Containeri ulikkaaqqasoq: Taamaammat banaanit naatsiiallu iginneqartut
Nutaarsiassamullu coronamut tunnganngitsumut saaginnariarta!
Brugsenip banaanerpassuit inerinneqanngitsut naatsiiarpassuillu asiusut Nuummi ikuallaaviup eqqaani containerimut juunimi eqqarpai.
AAMMA ATUARUK Containeri ulikkaaqqasoq: Taamaammat banaanit naatsiiallu iginneqartut
Naatsiiat asiummata banaanillu Danmarkimiit nassiunneqannginnerini inerititsisartumik seqqartarneqarluarsimagaluarlutik sungaartinnatillu inerinngitsoorsimammata containerimut eqqartariaqarsimagitik, Brugseni nassuiaavoq.
Nutaarsiassaq una 19.000-riarluni toorlugu iserfigineqarsimavoq.
6. DMI aqagu anorersuarnissaa pillugu: Sakkortoorujussuussaaq
Nutaarsiassaq coronamut tunnganngitsoq alla ukioq manna atuarneqarnerpaat qulit allattorsimaffianni aamma ilaavoq.
Kitaata sineriaani novembarimi anorersuarpoq, Joe Bidenillu ajugaaneranik kinguneqartumik amerikamiut præsidentimut ulloq taanna qinersipput.
AAMMA ATUARUK DMI aqagu anorersuarnissaa pillugu: Sakkortoorujussuussaaq
Anorleqalunilu sialussuarpoq, timmisartuussinissaraluit taamaatipput bussillu ingerlaaratik.
DMI-llu silasiortui Nuummi allaffittaaminni ulloq taanna sulerngaarput.
Nutaarsiassaq una 21.900-riarluni toorlugu iserfigineqarsimavoq.
5. Danmarkimi coronaviruseqarlutik napparsimmavinni uninngasut ikileriangaatsiartut
Nutaarsiassamut coronamut tunngasumut saaqqiinnariarta. Nutaarsiassaq taanna Danmarkimi upernaaq pisunut tunngavoq.
Danmarkimi covid-19-eqarlutik napparsimmavinni uninngasut ikileriangaatsiarsimasut, nutaarsiassami tassani maajimi saqqummiussatsinni allaqqavoq.
AAMMA ATUARUK Danmarkimi coronaviruseqarlutik napparsimmavinni uninngasut ikileriangaatsiartut
Nutaarsiassaq una 24.813-eriarluni toorlugu iserfigineqarsimavoq.
4. Ammaassiartoqqinneq sukkasuumik pisinnaasoq, politikerit isummerput
Nutaarsiassaq una maajip ulluisa 18-ianni saqqummiupparput. Timmisartuussisoqarunnaarneranik avataaniillu nunatsinnukartoqarsinnaannginneranik kinguneqartumik Danmarkimi nunatsinnilu marsimit apriilimut tamakkiisumik matusinerit pereersullu, timmisartuussinermut killilersuinerit qasukkaamineqarput.
AAMMA ATUARUK Ammaassiartoqqinneq sukkasuumik pisinnaasoq, politikerit isummerput
Coronavirusi Danmarkimi taamanikkut tuniluuppiarunnaarpoq, sivitsunngitsorlu Danmarkip nunattalu akornanni timmisartuussisoqaqqittalerpoq.
Nutaarsiassaq una 26.900-riarluni toorlugu iserfigineqarsimavoq
3. knr.gl/da/coronavirus
Ukioq manna atuarneqarnerpaat pingajuat nutaarsiassaviunngilaq.
Taannami nutaarsiassanut coronamut tunngasunut tamanut quppernerutipparput.
Qupperneq taanna 41.000-riarluni toorlugu iserfigineqarsimavoq – iserfigineqaqattaarsimaneralu nuannaarutigeqalugulu qujarupparput.
2. Danmarkimi inuit amerlanerusut katersuussinnaalissasut
Nutaarsiassaq una apriilimi, tassa corona Danmarkimi nunatsinnilu tuniluutileqqammertoq, saqqummiupparput. Taanna inuit katersuuttut amerlanerpaaffissaasa 100-nit 500-nut qaffanneqarnerannut tunngavoq.
Tamatuma kingorna pisoqaaluppoq, nunatsinnilu inuit isersimallutik katersuuttut 100-nit silamilu katersuuttut 250-nit maanna amerlaneroqqusaanngillat.
AAMMA ATUARUK Danmarkimi inuit amerlanerusut katersuussinnaalissasut
Danmarkimi inoqutigiit eqqaassanngikkaanni inuit katersuuttut qulinit amerlaneroqqusaanngillat.
Nutaarsiassaq una 49.900-riarluni toorlugu iserfigineqarsimavoq.
1. Tamaat isigalugu: Coronavirus pillugu killiffik
Atuarneqarnerpaaq anguinnaqaarput.
2020-mi nutaarsiassani atuarneqarnerpaap corona pillugu killiffimmut tunngasup toorlugu iserfigineqarnerpaasimanera eqqorpianngilaq. Taannami nutaanik pisoqarangaat tamatigut nutarteriarlugu saqqummiuteqqittarparput.
AAMMA ATUARUK Tamaat isigalugu: Coronavirus pillugu killiffik
Kisitsisilli takutippaat atuarneqarnerpaasoq – taannami 56.500-riarluni toorlugu iserfigineqarsimammat.