Trumpip aallartitaa Avannaata Qimussersuanut qaaqqusaajunnaartoq
USA-p Kalaallit Nunaannut immikkut aallartitaanut, Jeff Landrymut, Avannaata Qimussersuanut takornariartitsisarfik qaaqqusisoq, qaaqqusissummik tunuartitsivoq.
Kalaallit Nunaanni Qimussertartut Kattuffiat (KNQK), sakkanniunnermik aaqqissuussisoq, taama allakkatigut nalunaaruteqarpoq.
- USA-mi guvernørimik Jeff Landrymik qaaqqusisimaneq nunatsinni takornariartitsinermik suliffeqarfiup namminersortup taamaatikkaa KNQK ilisimatinneqarpoq.
- Tamanna KNQK-p tungaanit toqqissiallaatigalugu tusaatissatut tiguarput, taama allassimasoqarpoq.
Avannaata Qimussersua tassaavoq Kalaallit Nunaanni qimussimik pisortatigoortumik sukkaniunneq. Tamanna Qasigiannguani marsip ulluisa 28-anni ingerlanneqassaaq.
Kristian Jeremiassenip, takornarialerinermik ingerlatsivimmik Experience Qasigiannguanik piginnittup, Landry sukkaniunnermut qaaqqusimallugu, KNR-imut sapaatip-akunnerata siuliani marlunngornermi oqaatigaa.
- Suliffeqarfitsinnik nittarsaassinissaq sulissutigaarput, tamannalu politikkimut allanulluunniit attuumassuteqanngilaq, taanna KNR-imut oqarpoq.
Landryp sukkaniunnermut qaaqqusaanera KNQK-p isornartorsiorpaa, peqataanissaalu naleqqutinngitsutut oqaatigalugu. Taamaattumik kina qaaqqusisuusimanersoq paasineqarusussimavoq.
- Avataaniit politikkikkut tatiniaaneq KNQK-p siulersuisuisa akuerineqarsinnaanngitsutut isigaat, kattuffiup siulittaasua, Mikkel Jeremiassen, nalunaarummi allappoq.
Landry marsimi Kalaallit Nunaannut tikeraarnissaminik pilersaaruteqarnini pillugu tallimanngornermi Fox News-imit apersorneqarnermini oqarpoq.
Landryp Kalaallit Nunaanniinnissaa qimussimillu sukkaniunnermi peqataanissaa, folketingimut ilaasortap Aaja Chemnitzip (IA) uppernarsarpaa.
Landryp Kalaallit Nunaannut marsimi tikeraarnissani suli pilersaarutigineraa ilisimaneqanngilaq.
Avannaata Qimussersua aamma 2025-mi maluginiarneqarluarpoq, tassanimi USA-mi præsidentip tullersortaata J.D. Vancep nuliata Usha Vance qimussimik sukkaniunnermik isiginnaariartussaanera Præsidentip Illorsua nalunaaruteqarpoq.
Tamannali taamaatiinnarneqarpoq, taarsiullugulu Vancelu Amerikamiut sakkutooqarfiannut tikeraarput.
Qimussimik sukkaniunneq USA-mit Nuummi konsuuleqarfik aqqutigalugu aningaasatigut tapersersorneqartoq, Mikkel Jeremiassenip Sermitsiamut siorna marsimi uppernarsarpaa.
Jeff Landry, USA-mi Louisianami guvernøriusoq, USA-p præsidentiata Donald Trumpip Kalaallit Nunaannut immikkut aallartitatut decembarimi toqqarpaa.
Kalaallit Nunaat, Danmark Savalimmiullu peqatigalugit naalagaaffeqatigiinnut ilaasoq, Amerikamiut pigilerusukkaat, Donald Trumpip piffissami kingullermi arlaleriarluni oqaatigaa.
/ritzau/
