Avannaata Qimussersua 2026: USA qaaqquneqaqqippoq
Kristian Jeremiassenip e-mailikkut Atlantiku qulaallugu USA-mi politikeritut qaffasissumik inissisimasoq qaaqquaa, qimussimik misigisaqarnissaa, Kalaallillu Nunaallu qaninnerusumik takussagaa neriuutigalugu.
USA-p Kalaallit Nunaannut soqutiginninnerata annertusiartornerata nalaani tamanna pivoq.
Kristian Jeremiassen takornariartitsivimmik Experience Qasigiannguit-mik piginnittuuvoq, taassumalu Jeff Landry qaaqqusimallugu KNR-mut uppernarsarpaa.
– Sullitakka pillugit oqaaseqarsinnaanngilanga, takornariartitsisutulli Avannaata takornariaqarnerata siuarsarnissaa kissaatigaara. Taamaattumik inunnut assigiinngitsunut neqeroorutinik nassiussuivunga, taanna oqarpoq.
Kikkut allat qaaqqunerlugit oqaatigerusunngilaa, KNR-mulli uppernarsarpaa Jeff Landry qaaqquneqartut akornanniittoq.
Nipaalliorfioqisoq
Siorna taamaattoqarnera pillugu oqallinneq sakkortuupilussuusoq apeqqutaatinnagu, Kristian Jeremiassenip qaaqqusissut nassiuppaa. Taamanikkut USA-p vicepræsidentia J.D. Vance ukiumoortumik qimussersuarnissamut qaaqquneqarpoq – taamanilu Avannaata Qimussersuanngorniunneq Sisimiuni ingerlanneqarpoq.
Taanna nuliilu, Usha Vance, amerikamiut sakkutooqarfiannut Pituffimmut (Pituffik Space Base) – siornatigut Thulebasenimik taaneqartartumut – tikeraartussaanikuupput. Qimussersuarnissarli sioqqullugu qimussersuaqarneranut tikeraarnissaq taamaatiinnarneqarpoq, aappariillu Pituffimmuinnaq tikeraarnerat killeqarpoq.
Kikkut allat qaaqqunerlugit sooq oqaatigerusunnginneraa, KNR-p Kristian Jeremiassen aperaa.
Imalu akivoq:
– Ullaaq iterpugut suliassaq sammineqartoq. Amerikamiut tusagassiortui saaffiginnimmata paatsooqatigiittoqannginnissaa pillugu qaaqqusisimanera uppernarsartariaqalersimavara. Takornariartitsivipput nittarsaanniarlugu sulivugut, tamannalu politikimut tunngasuteqaranilu allanut attuumassuteqanngivippoq.
Kristian Jeremiassenip Jeff Landrymut e-maili nassiussani KNR-mut takutippaa.
Tassani Landry sammisassanut assigiinngitsunut aamma qaaqquneqarsimavoq.
Ilaatigut aqisserniarneq, qimusserneq, sikumi aalisarneq, qaqqani pisunnerit, arsarnerit kulturikkullu aaqqissuussat allat e-mailimi takuneqarsinnaapput.
Jeff Landry qaaqqusissummut akissuteqarsimanersoq aamma Qasigiannguanut tikerassanersoq KNR-ip aamma apeqqutigaa. Tamannali Kristian Jeremiassenip aamma oqaaseqarfigerusunngilaa.
Immikkut sinniisussatut toqqagaasoq
Jeff Landry decemberip ulluisa 22-anni 2025-mi USA-p præsidentianit Donald Trumpimit Kalaallit Nunaannut immikkut sinniisussatut toqqagaavoq. Taanna aamma naalagaaffiup immikkoortuani Louisianami guvernøriuvoq.
Trumpip nammineq inoqutinut attaveqaatimigut Truth Social-ikkut tamanna ima nalunaarutigaa:
– Louisianami guvernøri, Jeff Landry, USA-p Kalaallit Nunaannut immikkut sinniisussatut toqqarneqarneranik nalunaaruteqassallunga nuannaarpunga.
Trumpi allappoq nangillunilu:
– Kalaallit Nunaat nunatta isumannaallisarnissaanut qanoq pingaaruteqartigisoq, Jeffip ilisimavaa, taassumalu nunatta soqutigisai, ikinngutitta – aammalu silarsuup tamarmi isumannaatsuunissaa, toqqissisimanarnissaa piujuaannarnissaalu pillugit suliassanik siuarsaassaaq.
Taanna Republikaneri 54-inik ukiulik toqqarneqarnermi kingorna Trumpimut qujavoq.
Siorna pisup aalassattitsiffiusup kingorna, amerikamiunik politikerinik qaffasissumik inissisimasunik sooq qaaqquseqqittoqarnersoq, KNR-ip Kristian Jeremiassen aperaa. Tamannali itinerusumik oqaaseqarfigerusunngilaa.
– Politikkikkut oqaaseqanngivikkusuppunga. Una takornariaqarnermut tunngatillugu suliniarnerinnaavoq, taanna oqarpoq.
Qimussertartut kattuffiat qisuariarpoq
Kalaallit Nunaanni Qimussertartut Kattuffiat (KNQK) tusagassiuutinut tamanna pillugu nalunaaruteqarpoq.
Sapaatip-akunnerata siuliani sisamanngornermi amerikamiit tusagassiortumit saaffigineqarsimallutik, tassanilu ersersinneqarluni guvernøri Jeff Landry Avannaata Qimussersuanut qaaqquneqarsimasoq, peqatigiiffiup nalunaarummini ilisimatitsissutigaa
KNQK-p siulersuisuisa avataaniit politikkikkut tatiniaaneq akuerineqarsinnaanngitsutut isigaat, Avannaata Qimussersuani nunani allamiut politikkikkut peqataanissaat tulluanngilluinnartutut nalilerpaat.
Siulersuisut maanna illersuisut suleqatigalugit misissulerniaritsik kikkut nunanit allamiunik qaaqqusisuunersut, qimussertartut kattuffiata aamma ilisimatitsissutigaa. Misissuineq naammassippat siulersuisut sukumiinerusumik nalunaaruteqarumaarput.
KNQK-p siulittaasua, Mikkel Jeremiassen, tusagassiuutinut nalunaarummi ullumi ullaap tungaani nassiunneqartumi taama allappoq.
KNR-ip Experience Qasigiannguit qaaqqusisuuneranik uppernarsaatinneqarnerata kingorna, KNQK-p siulittaasua Mikkel Jeremiassen attavigaa. Oqaaseqartinnani suliassaq siulersuisuni oqaluusereqqaarniarlugu, taanna akivoq.
