Præsidentip tullersortaa nunatsinnut tikittoq

Amerikamiut præsidentiata tullersortaa, J.D. Vance nunatsinnut, Pituffik Space Basemut tikippoq.

Taassuma nulia, Usha Vance aamma USA-p naalagaaffiata isumannaallisaanermut siunnersortaa Mike Waltz, USA-p nukissiuuteqarnermut ministeria Chris Wright kiisalu republikanerit senatoriat Utah-meersoq, Mike Lee timmisartumut aamma ilaapput.

Amerikami arnat sallersaasa aappaata Nuummut Sisimiunullu angalallunilu Avannaata Qimussersuanut malinnaajartornissaata taamaatinneqarnerata kingunerisaanik Pituffimmut tikeraartoqarpoq. Kalaallimmi innuttaasut politikerillu isornartorsiuinerisa kingunerisaanik angalanissaq Pituffik Space Basemut angalanissanngortinneqarpoq.

Jens-Frederik Nielsen qisuariaateqartoq

Naalakkersuisoqatigiinnissamut isumaqatigiissut Nuummi Katuami ullaap tungaani atsiorneqareermat, Jens-Frederik Nielsen amerikamiut tikeraarnissaat pillugu TV2-mut DR-imullu oqaaseqarpoq:

- Naalakkersuisoqartinnagu tikeraarnissaannut pissutsit tamarmik iligisamut ataqqinninnginnermik takutitsinerusoq aalajangiusimavarput, naalakkersuisuni siulittaasunngortussaq oqarpoq, nangillunilu:

- Tamanna uggornarpoq, kisianni maanna naalakkersuisunik sulilersussaqalerpugut, taakkulu erngertumik sulilissapput, Jens-Frederik Nielsen oqarpoq.

Tusassip attaveerunnera

Pituffimmi tamarmi ullaaq siusinnerusukkut qamittoortoqartoq taamaammallu sakkutooqarfimmut atassuteqaatit tamarmik attaveerussimasut Tusassip ullumi siusinnerusukkut nalunaarutigaa.

- Base-mi innaallagissap qaminnera piffissamik eqquinerluttutut misinnarpoq, atortorissaarutitsinnummi kingunerlutsitsimmat. Taamaammat qujamasuutigeqaara, basemut attaveqaatit aaqqipallaassinnaasimagatsigit, Tusassip teknikkimut attaveqaatinullu akisussaasua, Jonas Hasselriis allappoq.