Motzfeldt Natomi ataatsimiinnerup kingorna: Kisimiinngitsutut misigisimavugut

Vivian Motzfeldtip Amerikamiut præsidentiata nunatsinnik tiguaanissamik siorasaaruteqarnera pillugu USA-mut Europamullu angalanerani Bruxellesimi ullumi naggaserneqarpoq.

Allattoq Christine Hyldal

januaarip 19-at 2026 16:52

Nutserisoq Connie Fontain

Nunanut allanut naalakkersuisup, Vivian Motzfeldtip pisassaqaqattaarnerani ataatsimiinneq alla naammasseqqippoq.

Taassuma Amerikamiut præsidentiata Kalaallit Nunaannik tiguaanissamik siorasaaruteqarnera pillugu USA-mut Europamullu angalanerani Bruxellesimi ullumi naammassivoq. Taassuma Natomi generalsekretæri, Mark Rutte danskit illersornissamut ministeriat, Troels Lund Poulsen peqatigalugu ataatsimeeqatigaa.

Mark Rutte Europamiut siulittaasui allarpassuartulli Kalaallit Nunaata siunissaa pillugu Danmarkip, Kalaallit Nunaata USA-llu akornanni pissutsit pissanganarnerat pillugu oqaaseqarpallaanngilaq. Vivian Motzfeldtili ataatsimiinnerup kingorna tusagassiortunut takkuttunut utaqqisunullu suliniutit tamarmik nunatta kisimiinnginneranik misigititsisut nuannaarutigalugit oqaatigaa.

- Tapersersorneqangaatsiarluta misigisimavagut. Aamma Natop najuunnerulernissaanut atatillugu, taanna oqarpoq.

Natop aalajangersimasumik suliaqalernissaa siunnersuutigigaat

Vivian Motzfeldtip Troels Lund Poulsenillu Natop Kalaallit Nunaanni Issittumilu aalajangersimanerusumik suliaqartarnissaa Mark Ruttemut siunnersuutigaat. Nunanit Natomut ilaasortaasunit arlalinnit sakkutuunik sungiusarnermut "Arctic Endurance"-imut peqataajartortunik ulluni kingullerni tikittoqarpoq, sungiusarnerli taanna danskinit aqunneqarpoq, Natomiillu aalajangersimasumik suliaqarnerunani.

Vivian Motzfeldt USA suli iligisatut isigineqarsinnaanersoq aperineqarami, ima akissuteqarpoq:

- Illersornissaqarnerput USA-p illersornissaqarneranut atassuteqarpoq.

Nunat sakkutuunik Kalallit Nunaannukartitsilersut aaku:

Sverige: Sakkutuut naalagai arlallit Kalaallit Nunaannut inissippai.
Norge: Sakkutuut naalagai marluk Kalaallit Nunaannut inissippai.
Tyskland: Inuit 13-it alapernaarsuisartut Kalallit Nunaannukartippai.
Tuluit Nunaat: Sakkutuut naalagaat ataaseq Kalaallit Nunaannukartippaa.
Frankrig: Sakkutuut 15-it Kalaallit Nunaanniitippai. Frankrigimiillu imaatigut, silaannakkut nunamilu ulluni tulliuttuni sakkutuuliinerussapput.
Holland: sakkutuut imarsiortut umiarsuaanniit sakkutuut naalagaat ataaseq Kalaallit Nunaannukartippaa.
USA: Pituffik Space Basemi inunnik 150-it missaanniitunik Kalaallit Nunaanniittuuteqareerpoq. Kalaallit Nunaannut illersornissamut isumaqatigiissut 1951-imeersoq naapertorlugu, USA-p sakkutuui sukkulluunniit Kalaallit Nunaannukariaannaapput.

Mark Rutte Troels Lund Poulsenip aamma Vivian Motzfeldtip ataatsimeeqatiginerisa kingorna tusagassiortunit apersorneqarnissamut ilaanngilaq.

Inoqatinut attaveqaatikkut X-ikkut taanna ima allappoq:

- Issittup – tassunga Kalaallit Nunaat ilanngullugu – ataatsimut sillimaniarnitsinnut qanoq pingaaruteqartiginera aamma Danmarkip atortunut pingaarutilinnut aningaasaliisinnaanera oqaluuseraagut. Apeqqutit uku pingaaruteqartut iligiittut suleqatigiissutigalugit ingerlateqqissavagut.

Just met w/ 🇩🇰 @troelslundp & Greenland 🇬🇱 FM Vivian Motzfeldt. We discussed how important the Arctic - including Greenland - is to our collective security & how 🇩🇰 is stepping up investments in key capabilities. We’ll continue to work together as Allies on these important issues pic.twitter.com/0uCNaf8urq
— Mark Rutte (@SecGenNATO) January 19, 2026

Nato 1949-mi pilersinneqarpoq, nunanillu 32-nik ilaasortaaffigineqarluni, taakkunannga nunat 30-t Europamiipput. Nunat marluk allat tassaapput USA Canadalu.

Vivian Motzfeldt nunatsinnut aqagu angerlassaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.