DMI-p Nuummi allaffittaavani sulileqqaartut anorersuarmit aninaveersinneqartut
Nuup Paamiullu akornanni marlunngornermi naqitsiniisaffik naqitsinikitsoq sakkortungaarmat DMI-p illoqarfiit pingaarnersaanni silasiorfiani sulisut silarlunneranik allaat nikeriarsinnaanngillat.
Silasiortoq, Anette Hartvig Nielsen silarlunnerani tassani sivisunerusumik sulisariaqarsimasunut ilaasoq oqarpoq.
AAMMA ATUARUK DMI Nuummut nuuttoq
- Suliffitsinniit anisinnaajunnaarpugut. Silasiorfik Kangerlussuarmiit Nuummut nooqqammivoq, ullorlu taanna aatsaat Nuummi ammalluni. Akunnerpaaluit suliffitsinniippugut, anoraami qaqutigoorpoq sakkortoorujussuullunilu, Nuummi silasiortoq Anette Hartvig Nielsen oqarpoq.
Trampolini Nuussuarmi qullersuarmiittoq. Assi: Jeanne Holm
Taassuma silap kianneruleriartornera ilutigalugu aamma anorlernerusarnissaa nassuiaatigaa, silaannarmi kissartoq sermersuarmit silaannarmut nillertumut aporaattarpoq.
AAMMA ATUARUK DMI aqagu anorersuarnissaa pillugu: Sakkortoorujussuussaaq
Nuummi marlunngornermi anoraasuarnera sekundimut 50 miiterit missaa angullugu sakkortussuseqartutut DMI-mit uuttorneqarpoq.
- Biilinit Qinngutsinni nuiagama qangattangajappunga. Nuannerpallaanngilaq, Anette Hartvig Nielsen oqarpoq.
Qujanartumilli ajornerusumik pisoqanngilaq. Anette Hartvig Nielsen nunatsinni piffissami sivisuumi silassamik suliaqarpoq, aatsaalli Nuummut nooqqammerpoq:
- Nuummi silassamik ilimasaarut suliarinerani silarlunnissaa takujuarpara, qanorli ajortiginera misiginikuunngilara. Misigisassaavoq aamma, Anette Hartvig Nielsen oqarpoq.