Neriuffik katersuiniarnermi aatsaat taama katersaqartigisoq
Neriuffik nuna tamakkerlugu tallimanngornermi unnukkut katersuiniarnerani 5.818.630 koruunit katersorneqarput.
- Iluatsippoq, iluatsilluartorujussuuvoq, aningaasanik taama amerlatigisunik katersisimanngisaannarpugut, Neriuffiup siulittaasua, Inger Eriksen KNR-imut arfininngornermi ullaakkut oqarpoq.
Nuummi kulturip illorsuani Katuami Hans Lyngep inersuanit toqqaannartumik aallakaatitsisoqarnerani ukioq manna aatsaat siullermeertumik isiginnaartoqarpoq, nuanneqaaq, Inger Eriksen oqarpoq.
- Ukioq manna nutaanik arlalinnik misiliivugut, iluatsilluarporlu. Isiginnaartoqarluni misigisaq nuannerpoq, taanna arfininngornermi ullaakkut oqarpoq.
Unnuup ingerlanerani aaqqissuussinermi periaaseq aamma nutaajusoq taanna oqarpoq.
- Aliasunneq pillugu piffissaq sivisooq atorlugu siusinnerusukkut oqaluuserinnittoqartarpoq, kisianni ippassaq unnuk neriuuteqarnermut tunngassasoq aalajangerpara.
Arlallit unnuup ingerlanerani attortittut
Inger Eriksenip ilaquttani arlallit nappaammut annaasimavai, taamaakkaluartorli neriuuteqartoqarsinnaanini attappaa, tamannalu ippassaq unnuup ingerlanerani arlaleriarluni aamma malugaa.
- Aallakaatitsinerup ingerlanerani arlaleriarlunga attortippunga. Video-aqqat timersoqatigiiffinnit meeqqaniillu ataatsimoornerput pillugu oqariartuuteqarfiusut takutinneqarneranni killitsippunga. Imaluunniit ilaqutariit allanit ikiuisoqarnera qanoq imminnut pingaaruteqartigineranik oqaluttuarneranni.
Siulittaasoq arnanit aallakaatitsinerup kingorna sms-imik nassinneqarpoq, aallakaatitsinerummi ataatsimoorneq ersarissisimammagu arnap nappaammik qaangiisinnaaneranik upperinnilersitsisoq Inger Eriksenimut ersarippoq.
- Tamanna attortissutigingaatsiarpara, Inger Eriksen oqarpoq.
Aningaasat sumut atorneqassappat?
Aningaasat Nuummi illumi nutaami sammisassanut ilaatigut atorneqassasut siulittaasup erseqqissaatigaa. Ilaatigut nerisassiornermut sinerissamilu innuttaasut malinnaasinnaaniassammata inoqatinut attaveqaatikkut toqqaannartumik aallakaatinneqartartumut ilaatigut atorneqassapput.
- Poorlunik smoothiesinillu sanasarpugut, taamaammat sumiluunniit najugaqaraanni peqataasoqarsinnaavoq, akugineqartummi sumiiffinni tamani pissarsiarineqarsinnaapput, taanna oqarpoq.
- Aningaasat ilaat inunnut nappaammik eqqugaasimasunut aamma atorneqassapput, tassa eqqugaasimasut qanigisaasulluunniit Danmarkimut Danmarkimiilluunniit angalanissamut akiliunneqarnissamut legatinik qinnuteqarsinnaapput.
Taassuma nappaammik eqqugaagaanni neriuuteqartuarnissap qanoq pingaaruteqartiginera naggasiutigalugu oqaatigaa.
- Nunatsinni inuit 250-it nappaammik ukiumut eqqugaasarput, taamaammat inuit kisimiinngillat. Amerlasuut kræftimik napparsimalertarput, oqariartuutillu siammarternissaa pingaaruteqarpoq, taanna oqarpoq.
